Polşada III Avropa Oyunları davam edir. İyunun 23-də 36 medal dəsti sahibini tapıb.
Azərbaycan idmançıları bu növlərdən boks, taekvondo, karate və kamandan oxatmada qüvvələrini sınayıblar.
Yarışda uğurla çıxış edən karateçimiz İrina Zaretska (68 kq) bütün rəqiblərinə qalib gələrək, qızıl medala yiyələnib. Bununla da idmançımız Avropa Oyunlarının ikiqat qalibi adına layiq görülüb. Ondan fərqli, Asiman Qurbanlı (84 kq) yarımfinalda mübarizəni dayandırdığından bürünc medalla kifayətlənib. Ümumilikdə karate yığmamız 3 medal qazanıb.
Qeyd edək ki, bundan əvvəl karateçimiz Tural Ağalarzadə (67 kq) yarışı qızıl medalla başa vurub. Komandamızın digər üzvü, taekvondoçu Qaşım Maqomedov (58 kq) Polşada üçüncü yeri tutub.
İyulun 2-dək davam edəcək III Avropa Oyunlarında 48 ölkədən 7 minə yaxın idmançı mübarizə aparır. Azərbaycan “Krakov-2023”də 13 növ üzrə 86 idmançı ilə təmsil olunur.
Leyla SABİRQIZI, Xalq qəzeti”