Fransanın Jardin şəhərində CDİ3* kateqoriyalı atçılıq idmanının dresaj növü üzrə beynəlxalq yarışda Azərbaycan təmsilçiləri Karina və Aqata Zəhrabəyovalar uğurla çıxış ediblər.
Almaniya, Fransa, Belçika, Böyük Britaniya, Niderland kimi 20-dən çox ölkədən idmançıların iştirak etdiyi mötəbər yarışa Aqata “RM Golden Showman”, Karina isə “Ein Stern” və “Delicato 2” atları ilə qatılıblar. Gərgin keçən mübarizədə Karina Zəhrabəyova həftəyə 74 faizdən çox xalla yekun vuraraq “Junior Freestyle” yarışının qalibi olub. Aqata Zəhrabəyova isə üç yarışda 70 faizdən çox xal toplayaraq ilk üçlükdə qərarlaşıb.
Tədbirin sonunda qaliblər pul mükafatı, medal və kuboklarla təltif ediliblər.
L.SABİRQIZI,
“Xalq qəzeti”