Yaraşığı və əzəməti ilə fəxr etdiyimiz Azərbaycanın ən böyük idman meydanı olan Bakı Olimpiya Stadionunda "Köhnə qitə"nin idman hərəkatında yeni dövrə start vermiş birinci Avropa Oyunlarının təntənəli açılış mərasimindən daha bir il ötür. Artıq səkkiz ildir ki, ölkəmiz tarixdə Avropa Oyunlarının vətəni kimi yaşayır. Əgər qədim Yunanıstan Olimpiya oyunlarının vətəni olması ilə fəxr edirsə, gündən-günə gözəlləşən, möhkəmlənən və beynəlxalq nüfuzu durmadan artan qüdrətli Azərbaycan Respublikası da Avropa Oyunlarının vətəni kimi tanınması ilə qürur duya bilər. Deməli, nə qədər ki, bir an belə dayanmayan heyrətamiz idman həyatı davam edir, bu iki ölkəyə və onların baş şəhərləri Afina ilə Bakıya beynəlxalq dairələrdə xüsusi hörmət və ehtiramla yanaşılacaq.
Təsadüfi deyil ki, "Bakı–2015"in xarici ölkələrdə ilk təqdimat mərasimlərindən biri 2014-cü ilin sentyabr ayında, Bakıda Avropa Oyunlarının açılışına doqquz ay qalmış Afinanın "Akropol" muzeyində keçirilmişdi. Hələ onda Yunanıstan Milli Olimpiya Komitəsinin rəhbəri Spiros Kapralos Avropa qitəsində baş tutacaq Oyunlara hazırlığın yüksək səviyyədə getdiyini bildirərək, Azərbaycanın birinci xanımı Mehriban Əliyevanın rəhbərliyi altında Avropa Oyunlarının Təşkilat Komitəsinin gərgin işlədiyini və bu prosesə Prezident İlham Əliyevin güclü dəstək verdiyini xüsusi qeyd edib, onu da vurğulamışdı ki, bütün Avropa kimi, Yunanıstanda da Bakı startlarını böyük maraqla gözləyirlər.
Paytaxtımızda yarışların elə ilk günlərindən aydın oldu ki, Avropa idman hərəkatında yeni səhifə açıldığını bildirən "Bakı-2015" ümidləri tam doğruldacaq. Müasir idman meydanlarında ən yüksək səviyyədə təşkil edilib, hamıda xoş əhval yaradan maraqlı və gərgin startlarda 50 ölkənin 6000-dən çox təmsilçisi ideal şəraitdə mübarizə aparmaqdan böyük zövq aldı. İştirakçıların hər biri, hətta medal qazana bilməyib, fəxri kürsüdən kənarda qalanlar da tarixdə ilk Avropa Oyunlarında yarışmağına şad idi. Mükəmməl şəkildə təşkil edilən turnirlər hamının ürəyindən olmuşdu.
İndi, aradan səkkiz il keçdikdən sonra 2015-ci il iyunun 12-dən 28-dək Azərbaycanın bütün bölgələrində unudulmaz idman bayramını xoş bir həyəcanla izləmiş vətəndaşlarımızın, eləcə də, Avropa ilə yanaşı dünyanın bir çox ölkəsində milyonlarla idman pərəstişkarının "Bakı-2015"dən necə xoş təəssürat aldığı xatirələrdə hələ çox yaşayacaq. Paytaxtımızda birinci Avropa Oyunlarının ən yüksək səviyyədə, hətta bir çox məşhur mütəxəssisin və nüfuzlu idman nəşrlərinin yekdilliklə etiraf etdikləri kimi, Olimpiya oyunları səviyyəsində keçirildiyi barədə bir-birindən xoş rəyləri unutmamışıq. Bununla belə, "Bakı-2015"in 8 yaşının tamam olduğu günlərdə bəzi məqamlar üzərində dayanıb, tarixdə Avropa Oyunlarının vətəni Azərbaycana beynəlxalq idman dairələrində göstərilən böyük hörmət və ehtiramı bir daha nəzərə çatdırmaq yerinə düşər.
Avropa Oyunlarının ilk paytaxtı adını qitənin hər hansı bir nəhəng ölkəsinin baş şəhəri, deyək ki, Moskva, London, Berlin, Roma, Paris, Madrid yox, Azərbaycanın zəngin idman ənənələrinə malik paytaxtı daşıyır. Bu, Bakıya və bakılılara, bütün Azərbaycana, onun dostlarına xoşbəxtlik hissləri yaşadan böyük etimaddır. Həm də şəhərimizin dünyanın ən yaxşı idman mərkəzlərindən biri olmasının dolğun təzahürüdür.
Bakı Avropanın ona göstərdiyi yüksək etimadı şərəf və ləyaqətlə doğrultdu. Oyunların əla təşkili dünyanın, demək olar, hər yerində böyük rəğbətlə qarşılandı, hamı yarışların bütün iştirakçıların və rəsmi şəxslərin qəlbində xoş hisslər oyatdığını, Azərbaycan qonaqpərvərliyini və səmimiyyətini, turnirlərin bütün beynəlxalq standartlara uyğun keçirildiyini, medallar uğrunda mübarizənin ədalətli idman rəqabəti şəraitində davam etdiyini sevinclə bildirdi.
Beynəlxalq dairələrdə Azərbaycana, dövlətimizə böyük rəğbət respublikamızın uğurlarını, həyatın bütün sahələrində sürətli inkişafını gözü götürməyənlərə, onların Avropa Oyunlarını boykot etmək çağırışlarına layiqli cavab idi və bədxahlarımızı geri çəkilib susmağa məcbur etdi. Azərbaycan irəliləyişimizə mane olmaq üçün dəridən-qabıqdan çıxan qara qüvvələri öz yüksək mədəniyyəti, əla təşkilatçılıq bacarığı, hər bir qonağa qayğıkeş münasibəti, gərgin mübarizə meydanında qələbə və medalları ilə susdurdu.
Bununla da ölkəmiz inamla təsdiq etdi ki, Avropa Oyunları Azərbaycan dövlətinin və idmanının zəfər marşıdır. Dünya Azərbaycanın nəyə qadir olduğunu bir daha yəqin etdi.
Yadımdadır, "Bakı-2015"də qonağımız olmuş xarici ölkə mütəxəssislərindən biri öz ölkəsinin müxbirləri ilə müsahibəsində Azərbaycanda Avropa Oyunlarını ümummilli layihə adlandırmışdı. Bu isə o demək idi ki, ölkəmizdə heç kim qitə idman hərəkatında yeni mərhələ olan yarışlara hazırlıqdan kənarda qalmamış, hamı startların yüksək səviyyədə təşkil edilib, keçirilməsi üçün əlindən gələni edərək, Avropa Oyunlarını gənclərin parlaq idman bayramına çevirmişdir.
İspaniya Milli Olimpiya Komitəsinin prezidenti Alexandro Blanko sanki hər şeyin əla olacağını qabaqcadan hiss edirmiş kimi, hələ Avropa Oyunları başlamazdan əvvəl belə bir fikir söyləmişdi ki, Bakı Avropa üçün çox vacib olan bu yarışları sensasiyalı şəkildə təşkil edəcək. Belə də oldu, finişdən sonra Avropanın hər yerində ölkəmizin ünvanına çoxlu minnətdarlıq sözləri söylənildi. 28 iyun axşamında Bakı Olimpiya Stadionunda tarixdə ilk Avropa Oyunlarının təntənəli bağlanış mərasimində isə Azərbaycanda zəfər marşı daha ucadan səsləndi.
Paytaxtımızda yarış günlərində kiçik San-Marinodan tutmuş Avstraliyaya, Kuba və Monteneqroya, İspaniya və Çin Xalq Respublikasına qədər, bir sözlə, dünyanın hər yerində əzəməti ilə hamını valeh edən gözəl paytaxtımıza ünvanlanan və hər bir Azərbaycan vətəndaşının qəlbini riqqətə gətirən xoş sözlər Bakının zirvədə dayanmasına dərin ehtiramın ifadəsi idi.
Adını çəkdiyimiz ölkələrlə yanaşı, Türkiyə, Rusiya, Gürcüstan, Ukrayna, Belarus, Almaniya, İtaliya, Böyük Britaniya və digər dövlətlərin nümayəndələri də Bakının qonaqlara göstərdiyi səmimiyyət, onların paytaxtımızda özlərini evdəki kimi hiss etmələri üçün yaradılan gözəl şərait haqqında razılıq hissi ilə söz açmışdılar.
Azərbaycan dövlətinin rəhbəri, Milli Olimpiya Komitəsinin prezidenti İlham Əliyevin respublikamıza rəhbərliyinin 12-ci, ölkə olimpiya hərəkatına isə lider seçilməsinin 18-ci ilinə təsadüf etmiş Avropa Oyunları və bu mötəbər yarışda milli komandamızın ümumi hesabda yalnız Rusiyadan geri qalıb, 56 medal – 21 qızıl, 15 gümüş və 20 bürünc mükafatla 50 ölkə arasında finişə ikinci çatması, Böyük Britaniya, Almaniya, Fransa, İtaliya kimi ölkələri geridə qoyması istər təşkilatçılıq, istərsə də nəticə baxımından fantastik nailiyyət idi.
"Bakı-2015"in bağlanış mərasimindən dərhal sonra Kuba Kommunist Partiyası Mərkəzi Komitəsinin orqanı "Qranma" qəzetinin Prensa Latina Agentliyinə istinadla yazdığı "Bakıda birinci Avropa Oyunlarının ən yüksək səviyyədə təşkili göstərdi ki, bu paytaxt şəhər Olimpiya oyunlarını da keçirə bilər" fikri də deyilənlərin təsdiqi idi.
London Olimpiadası–2012-nin bürünc mükafatçısı, Bakıda Avropa Oyunlarında Belarus Respublikasının bədii gimnastika üzrə yığma komandasının məşqçisi olmuş Lyubov Çerkaşinanın "Veçerni Brest" qəzetinə söylədikləri ölkəmizin qüdrəti, ildən-ilə Azərbaycanda baş verən xoş dəyişikliklər barədə ürəkdən gələn fikirlər idi:
"Məndə Azərbaycan və Bakı haqqında ən yaxşı xatirələr qalıb. Əgər sırf idman məsələlərini nəzərə alsaq, birinci Avropa Oyunları çox yüksək hədd müəyyənləşdirib. Ona görə də ikinci oyunların təşkilini öhdəsinə götürən şəhər üçün çox çətin olacaq. Azərbaycan öz qonaqpərvərliyi və maliyyə imkanları ilə hər şeyi yüksək səviyyədə təşkil etmişdi, burada dünya miqyasında tanınan mütəxəssislər işləyirdilər. Bütün bunlar mənə London Olimpiadasını xatırladırdı.
Bakı gözəl şəhərdir. Bu şəhər daim inkişaf edir... Mən müqayisə apara bilərəm: 2003-cü ildə Bakıda olmuşdum, 2015-ci ildə də oldum. Ondakı Bakı ilə indiki Bakı arasında yerlə göy qədər fərq var".
Biz isə əlavə edib, deyə bilərik ki, son səkkiz il ərzində həmin fərq dəfələrlə artmışdır. Əgər Azərbaycan 2015-ci ildə Avropa Oyunlarını erməni işğalçılarla müharibə şəraitində keçirmişdisə, artıq torpaqlarımız azaddır, indi bu gözəl yerlərdə – doğma, əziz Şuşada, dupduru, şəffaf Suqovuşanda və azad olunmuş digər ərazilərdə nəinki ölkədaxili, hətta beynəlxalq yarışlar keçirilir, müasir idman bazaları inşa olunur.
...Unudulmaz "Bakı–2015" şənliklərindən səkkiz il ötür. Bu müddət ərzində ikinci Avropa Oyunları da baş tutmuşdur. Səkkiz il əvvəl estafeti Azərbaycan paytaxtından qəbul edən Minsk 2019-cu ilin yayında qitənin ən yaxşı idmançılarını gül-çiçəklə qarşılamışdı.
Bu gün isə üçüncü Avropa Oyunları ərəfəsindəyik. Tezliklə qitəmizin idman ulduzları Polşanın Krakov şəhərində görüşəcəklər. İyunun 21-də başlayıb, iyulun 2-də finişə çatacaq bu yarışlar tarixi 2015-ci il Bakı startlarından hesablanan və vətəni Azərbaycan olan Avropa Oyunlarında növbəti böyük idman bayramı ilə əlamətdar olacaq.
Oqtay BAYRAMOV,
Əməkdar jurnalist