Bu gün futbol üzrə Azərbaycan Premyer Liqasında XXXIII tura start veriləcək. Peşəkar Futbol Liqasının yaydığı məlumata görə, turun ilk qarşılaşması “Kəpəz” və “Sabah” komandaları arasında baş tutacaq. Həmin görüş saat 18:00-da başlayacaq. Qəbələ şəhər stadionunda keçiriləcək matçı hakim Rəşad Əhmədov idarə edəcək.
Qeyd edək ki, turun digər qarşılaşaması mayın 6-da “Şamaxı” və “Zirə” komandaları arasında baş tutacaq. Şamaxı şəhər stadionunda keçiriləcək görüş saat 16:30-da başlayacaq. Oyunu hakim Cavid Cəlilov idarə edəcək.
XXXIII turun daha iki görüşü isə mayın 7-nə təsadüf edəcək. Həmin gün saat 15:00-da “Turan Tovuz”-“Neftçi”ni qəbul edəcək. Görüşün baş hakimi Kamal Umudlu olacaq.
Eyni gündə “Sumqayıt” klubu autsayder “Səbail”i sınağa çəkəcək. “Kapital Bank Arenada” keçiriləcək oyunu hakim İnqilab Məmmədov idarə edəcək. Oyun saat 19:00-da start götürəcək.
Qeyd edək ki, tura mayın 8-də “Qarabağ”-“Qəbələ” matçı ilə yekun vurulacaq. Qarşılaşma saat 20:00-da “Azersun Arenada” baş tutacaq. Matçın hakimi Rəvan Həsənzadə olacaq.
Elçin ABBASOV,
“Xalq qəzeti”