Ümummilli lider Heydər Əliyevin anadan olmasının 100 illik yubileyinə həsr olunmuş avarçəkmə üzrə “Prezident kuboku-2023” beynəlxalq reqatası başlayıb. Suqovuşanda keçirilən yarışın birinci günündə ilk qaliblər bəlli olub.
2005-2006-cı il təvəllüdlü oğlanların birnəfərlik qayıqda 200 metr məsafəyə yarışında Elmir Məmmədov, Sezar Amari (Moldova), Radislav Çifliqarov (Bolqarıstan) ilk üçlükdə qərarlaşıblar. 2007-2008-ci il təvəllüdlü qızların mübarizəsində Yıldız Özgün Naz (Türkiyə) birinci yeri tutub. Mişel Fessun (Ukrayna) ikinci, Mixaela Rusu (Rumıniya) üçüncü yerlərə layiq görülüblər. 2009-2010-cu il təvəllüdlü qızların yarışı isə Evelina Kostenkonun (Qazaxıstan) qalibiyyəti ilə başa çatıb. İzabela Aleksandra Jarnovska (Polşa) və Sofiya Nenno (Moldova) sonrakı pillələrdə qərarlaşıblar.
Yarışlar mayın 7-dək davam edəcək. Reqatada 20-dək ölkədən avarçəkmə akademik, kayak və kanoe növlərində 100-dən çox yerli və xarici idmançı mübarizə aparır.
Yarışın növbəti mərhələləri Mingəçevirdəki “Kür” Olimpiya Tədris-İdman Mərkəzində, mükafatlandırılma və bağlanış mərasimi Bakıda təşkil ediləcək.