Xorvatiyanın paytaxtı Zaqrebdə keçirilən Avropa çempionatında sərbəst güləşçilərimiz böyük uğurla iştirak edirlər. Yarışın ikinci gününü güləşçilərimiz 2 qızıl, 1 gümüş medalla başa vurublar.
İlk medalı komandamızın aktivinə Əliabbas Rzazadə (57 kq) yazdırıb. Qızıl medal uğrunda Türkiyə təmsilçisi Süleyman Atlıya heç bir şans verməyən 25 yaşlı pəhləvanımız təcrübəli rəqibini vaxtından əvvəl 12:2 hesabı ilə məğlub edərək karyerasında ilk Avropa çempionluğunu qazanıb.
Növbəti uğur Hacı Əliyevdən (70 kq) gəlib. Rəqibi Ramazan Ramazanovu (Bolqarıstan) finalda 10:3 hesabı ilə məğlub edən millimizin kapitanı dördqat Avropa çempionu tituluna sahib olub.
Təmsilçimiz – son Avropa çempionu Maqomedxan Maqomedov (97 kq) həlledici mərhələdə Givi Matçaraşvili (Gürcüstan) ilə qarşılaşıb. Azərbaycan təmsilçisi öndə olsa da, son saniyələrdə üstünlüyü əldən verərək, 3:4 hesabı ilə məğlub olub və ikinci yerlə kifayətlənib.
Komandamızın digər üzvləri Səbuhi Əmiraslanovun (79 kq) zədəsi bürünc medal uğrunda serbiyalı Hetik Çabolovla görüşə çıxmağa imkan vermədiyi üçün 5-ci yerlə kifayətlənib. Əli Rəhimzadə (65 kq) isə bürünc medal uğrunda qarşılaşmada ukraynalı Erik Aruşanyana minimal fərqlə (6:7) uduzub.
Leyla QURBANOVA,“Xalq qəzeti”
