Kişilər və qadınlar arasında Azərbaycan çempionatlarında növbəti oyunların vaxtı dəqiqləşib. Azərbaycan Voleybol Federasiyasından qəzetimizə verilən məlumatda bildirilir ki, IV dövrənin oyunları bu gün və sabah start götürəcəcək.
Bu gün qadın voleybolçular arasında Yüksək Liqada X turun oyunları keçiriləcək. İlk olaraq meydana “Azərreyl” - “Murov” klubları çıxacaq. Görüş saat 16:00-da baş tutacaq. Turun növbəti qarşılaşmasında isə “Abşeron” və UNEC üz-üzə gələcək. Həmin oyunun start fiti isə saat 18:00-da çalınacaq.
Qeyd edək ki, sabah isə kişi voleybolçular arasında Yüksək Liqada X turun oyunları keçiriləcək. Voleybol Mərkəzində təşkil ediləcək turun ilk matçı saat 16:00- da “Neftçi” və “Murov” komandaları arasında olacaq. Saat 18:00-da isə MOİK - “Xarı bülbül” dueli start götürəcək.
Elçin AĞAMİRZƏ, “Xalq qəzeti”
.jpg)
