Azərbaycan Dövlət Aqrar Universitetinin (ADAU) rektoru Zəfər Qurbanov Almaniyanın Vaynştefan-Trisdorf Tətbiqi Elmlər Universitetinə səfər edib.

AZƏRTAC-ın bölgə müxbiri xəbər verir ki, səfər çərçivəsində keçirilən Rektorlar Konfransında dünyanın müxtəlif ölkələrindən 20-yə yaxın aqrar yönümlü universitetin rektorları iştirak edib.

Konfrans zamanı keçirilən görüşlərdə birgə elmi-tədqiqat, layihə, eyni zamanda, ikili diplom proqramlarının həyata keçirilməsi ilə bağlı ilkin razılıq əldə olunub.

Həmçinin Z.Qurbanov Almaniyanın Vaynştefan-Trisdorf Tətbiqi Elmlər Universitetində magistratura səviyyəsində təhsil alan ADAU məzunları ilə görüş keçirib, onları maraqlandıran sualları cavablandırıb.

Qeyd edək ki, ADAU ilə Almaniya Federativ Respublikasının ali təhsil müəssisələri ilə geniş təcrübə mübadiləsi həyata keçirilir. Azərbaycan Dövlət Aqrar Universitetinin “Menecment” (alman proqramı) ixtisasında təhsil alan onlarla tələbə hər il Almaniyaya Vaynştefan-Trisdorf Tətbiqi Elmlər Universitetinə magistratura təhsili almaq üçün gedir.