Xəbər verildiyi kimi, sentyabrın 24-də Almaniyanın Hamburq şəhərin­də “Wind Energy Hamburg” konfransı keçirilib. Azərbaycanın energeti­ka naziri Pərviz Şahbazov tədbirin “İnvestisiyalar və qlobal əməkdaşlıq” panelində əsas məruzəçi kimi çıxış edib. 

Nazir bildirib ki, ölkəmiz təhlükəsiz iqlimli və enerji təminatlı gələcək üçün bərpaolunan enerjini unikal və effektiv həll olaraq qəbul etdiyini özünün 2030-cu ilədək olan transformativ inkişaf strategi­yası və bərpaolunan enerjini prioritetləş­dirən yeni enerji siyasəti ilə təsdiqləyib. Azərbaycanın regionda bərpaolunan enerji sahəsində investisiya və qlobal əməkdaşlı­ğı uğurla təmin və təşviq edən ölkə oldu­ğunu vurğulayan Pərviz Şahbazov deyib: “Hazırda münbit sərmayə və əməkdaşlıq mühiti sayəsində 2 qiqavat gücündə “yaşıl” enerji layihələrimiz beynəlxalq investorlar tərəfindən maliyyələşdirilir. 2 milyard dol­lar civarında investisiya və dünyanın aparı­cı enerji şirkətləri ilə tərəfdaşlığımız imkan verir ki, 2027-ci ilə bərpaolunan enerjinin quraşdırılmış gücdə payını 33 faizə yük­səldək. Bu məqsədlə həmin elektrik stansi­yalarının şəbəkəyə vaxtında və problemsiz inteqrasiyası üçün şəbəkənin gücləndiril­məsinə Avropa Yenidənqurma və İnkişaf Bankı, Dünya Bankı ilə yanaşı, dövlətin də maliyyə dəstəyi cəlb olunub.”

Azərbaycanın energetika naziri Xəzər dənizinin 157 qiqavatlıq külək enerji po­tensialı əsasında 2037-ci ilədək beynəlxalq enerji şirkətləri ilə mərhələlərlə həyata keçiriləcək 18 qiqavatlıq elektrik enerjisi, “yaşıl” hidrogen və “yaşıl” ammonyakın istehsalı, həmçinin üç “yaşıl” enerji dəh­lizi layihələri barədə tədbir iştirakçılarına məlumat verib. Xəzər–Qara dəniz–Avropa “yaşıl” enerji dəhlizi 2040-cı ilədək elekt­rik enerjisinə tələbatın 50 faiz artacağı, hidrogen idxalı ilə bağlı planları və enerji təhlükəsizliyi kontekstində Avropa İtti­faqının strateji marağında olan layihə kimi dəyərləndirilib. Eyni zamanda, dənizdə külək enerjisi stansiyaları üçün avadanlıq istehsalı, hidrogen, enerji saxlama sistem­ləri, “yaşıl” enerji dəhlizi layihəsi, elektrik enerjisi axınının optimallaşdırılması üçün Avropanın elektrik enerjisi istehlakçıları­nın Azərbaycanda istehsal olunan külək enerjisi ilə əlaqələndirilməsi üzrə geniş əməkdaşlıq imkanları Avropa Külək Ener­jisi Assosiasiyası və alman şirkətləri ilə tərəfdaşlığı inkişaf etdirmək aspektində diqqətə çatdırılıb. 

Nazir Azərbaycanın Avrasiya miqyaslı “yaşıl” enerji fəaliyyətinin COP29-un dün­yada “xalis sıfır”a nail olmaq üçün dar bo­ğazların aradan qaldırılmasını hədəfləyən enerji təşəbbüslərini formalaşdırdığını da diqqətə çatdırıb. Qeyd olunub ki, 2030-cu ilədək regionlararası “yaşıl” enerji bağ­lantılarının qurulması, qlobal enerjinin saxlanılması potensialının altı dəfə artırı­laraq 1500 qiqavata çatdırılması, 2040-cı ilədək 80 milyon kilometrdən çox enerji şəbəkəsinin ümumi şəbəkə sisteminə əlavə edilməsi və ya təmir edilməsi, hidrogen sənayesinin inkişafını nəzərdə tutan “Yaşıl Enerji üzrə Zona və Dəhlizlər Öhdəliyi”, “Qlobal Enerji Anbarları və Şəbəkələri Öhdəliyi”, həmçinin “Hidrogen Bəyan­naməsi” təşəbbüsləri investisiya axınını artıracaq. “Hesab edirik ki, COP28 bərpa­olunan enerjinin üçqat, enerji səmərəliliyi­nin isə ikiqat artırılması hədəfini irəli sür­müşdüsə, COP29 bu hədəflərə nail olmağı dəstəkləyən platforma olacaq,”– deyə mə­ruzəçi əlavə edib. 

Daha sonra tədbir COP29 Sədrliyinin enerji keçidinin maliyyələşdirilməsi üzrə fəaliyyətinə və Azərbaycanın ənənəvi və bərpaolunan enerji növlərini balanslaş­dıran enerji siyasətinə dair müzakirələrlə davam edib.

Energetika naziri Pərviz Şahbazov sö­zügedən konfransın “Enerji keçidi dövrün­də” adlı panel iclasındakı çıxışı zamanı isə ölkəmizin Avropaya “yaşıl” enerji ixracı siyasəti ilə bağlı fikirlərini bölüşüb. Qeyd olunub ki, növbəti 6 il ərzində yaradılacaq azı 7 qiqavat “yaşıl” enerji güclərinin 70 faizindən çoxu ixraca yönəldiləcək, bu məqsədlə Avropaya müxtəlif marşrutlarla enerji təchizatının yeni xəritəsi tərtib edi­lib.

Nazir “köhnə qitə”yə Xəzər–Qara də­niz–Avropa sualtı kabel xətti ilə ilkin mər­hələdə 4 qiqavat, Naxçıvandan isə 1 qiqa­vat bərpaolunan enerjinin ixracı ilə yanaşı, Xəzərdən və Mərkəzi Asiyadan da elektrik enerjisinin Türkiyə və Avropaya ötürülmə­si perspektivinə malik Azərbaycan–Tür­kiyə–Avropa “yaşıl” enerji dəhlizlərinin icra vəziyyəti barədə də ətraflı məlumat verib. P. Şahbazov, həmçinin yaxın vaxt­larda “Azərbaycan, Qazaxıstan və Özbə­kistan arasında “yaşıl” enerjinin inkişafı və ötürülməsi sahəsində strateji tərəfdaşlıq haqqında Hökumətlərarası Saziş”in im­zalanacağını, Xəzər–Qara dəniz–Avropa “yaşıl” enerji dəhlizinin Mərkəzi Asiyaya qoşulması imkanlarının müzakirə edildi­yini diqqətə çatdırıb: “Bu layihələrin uni­kallığı ondan ibarətdir ki, həmin dəhlizlər bərpaolunan enerji sistemində regionları və qitələri əlaqələndirəcək. Avropaya “ya­şıl” enerjini müxtəlif marşrutlarla Xəzər və Mərkəzi Asiya regionları kimi etibarlı enerji mənbələrindən gətirməklə strateji missiya yerinə yetirmiş olacaq. Ən önəm­lisi, Avropada bərpaolunan enerji Şimal dənizi və Xəzər dənizi ilə balanslaşdırıla bilər. Bütün bunlar ölkəmizin bərpaolunan enerji resurslarına transformasiya etmək və “yaşıl” enerjinin təchizatında regional lider olmaq əzmini nümayiş etdirir.” 

“Yaşıl” enerji dəhlizlərinin COP29 Sədrliyinin 14 təşəbbüsündən biri ol­duğunu diqqətə çatdıran P. Şahbazov Xəzər–Qara dəniz–Avropa Yaşıl Enerji Dəhlizi üzrə Liderlər Sammitinin, həmçi­nin “Mərkəzi Asiya ölkələri üçün İnvesiya Forumunun keçirilməsi ilə COP29-un bər­paolunan enerjinin tədarükü ilə bağlı regi­onal təşəbbüslərimizə qlobal marağı cəlb edən və töhfə verən platforma olacağını vurğulayıb. 

Panel iclasının sonunda biznes sektoru və medianın iştirakı ilə Azərbaycanda “ya­şıl” enerji keçidi və enerji ixracı ilə bağlı “dəyirmi masa” və müzakirələr keçirilib.