Bugünlərdə Qızılağac Dövlət Təbiət Qoruğunun bazasında milli park yaradılmasının 5-ci ili tamam olur. Bu münasibətlə xüsusi mühafizə olunan təbiət ərazisində “Flaminqo festivalı” keçiriləəcək.
Ekologiya və Təbii Sərvətlər Nazirliyi Bioloji Müxtəlifliyin Qorunması Xidmətinin rəisi Firudin Əliyev bildirdi ki, ölkəmizdə xüsusi mühafizə olunan təbiət əraziləri şəbəkəsinin genişləndirilməsi, bioloji müxtəlifliyin qorunub saxlanılması, təbii resurslardan səmərəli istifadə edilməsi və ekoturizmin inkişafına diqqət ümummilli lider Heydər Əliyevin ekoloji siyasətindən irəli gəlib. Prezident İlham Əliyein 26 sentyabr 2018-ci il tarixli sərəncamı ilə Lənkəran, Masallı və Neftçala rayonlarının inzibati ərazilərində Qızılağac Milli Parkının yaradılması bu siyasətin layiqincə davam etdirilməsinin daha bir sübutudur. Milli Parkın yaradılmasının 5 illiyi münasibətilə keçirilən tədbirin Flaminqo quşunun adı ilə bağlanması təsadüfi deyil. Flaminqo nadir quşların məskəni olan Qızılağac Milli Parkının daimi sakinidir.
“Flaminqo festivalı” dövlət rəsmilərinin, qeyri-hökumət təşkilatlarının, özəl şirkətlərin nümayəndələrinin və məktəblilərin iştirakı ilə Qızılağac Milli Parkının ərazisində keçiriləcək. Məqsəd əlamətdar tarixdə bu nadir parkın fəaliyyətini, həmçinin digər milli parkların təbliği istiqamətində görülən işləri, təbiətimizin rəngarəngliyini, biomüxtəlifliyini nümayiş etdirməkdir.
Təbii sərvətləri, iqlim şəraiti ilə diqqət çəkən Azərbaycan ərazisində Qızılağac qoruğu özünəməxsus və bənzərsiz məkandır. Bu yerlərin həlim iqlimi müxtəlif növ iri heyvanların, quşların, sürünənlərin və başqa canlıların normal yaşaması, nəsil verməsi üçün çox əlverişlidir. Tarix boyu bir tərəfdən Xəzərin qalxıb-enməsi, əks səmtdən Kür, Araz, Talış dağlarından axan çaylar, Muğandan yön alan axarlar dənizin cənub-qərbində Qızılağac körfəzini formalaşdırıb. Qərbdən quru, cənubdan nəmiş subtropik, şimaldan mülayim, şərqdən səhra iqlimi ilə əhatə olunan Qızılağac körfəzini çəmənliklər, qamışlıqlar, çay vadiləri əhatə edib.
Qızılağac körfəzi lap qədimdən 2 əsas sərvəti – balıq ehtiyatının və köçəri, yerli su quşlarının çoxluğu ilə diqqəti cəlb edib. Buraya Avropanın şimalından, Qərbi Sibirdən, Uraldan, Qazaxıstandan, Karsk və Ağ dəniz sahillərindən, Peçora, Ob çayları hövzələrindən, Baykal gölündən, Uzaq Şərqdən, Yaponiya, Skandinaviya ölkələrindən quşlar gəlir. Uzun illər boyu Qızılağac körfəzi ona qonşu göl, bataqlıqları ilə “Quşlar diyarı” kimi təbiətşünasların, səyyahların, nəhayət, ornitoloq-zooloqların diqqətini cəlb edib.
I Pyotr 1722-ci ildə Xəzərətrafına yürüşü zamanı bu körfəzin öyrənilməsini əmr edib. 1726-cı ildə ilk müfəssəl xəritə hazırlanıb. 1913-cü ildə Tiflisdə keçirilən naturalistlərin, tibb işçilərinin 13-cü qurultayında Azərbaycan sularında qışlayan quşların mühafizəsini təşkil etmək məsələsi müzakirə olunub. Bu məqsədlə Şirvanda, Muğanda, Lənkəranda, Qızılağac körfəzi və başqa sahələrdə quşların qorunması üçün rəsmi qoruq-yasaqlıqların yaradılması təşəbbüsü irəli sürülüb. Lakin verilən təkliflərin heç biri həyata keçməyib. Mütəxəssis-alimlər öz istəklərinə ancaq 14 ildən sonra nail olublar: Qızılağac körfəzi 1926-cı ildə yasaqlıq, 1929-cu ildə isə qoruq statusu aldı.
Qızılağac qoruğunun ümumi sahəsi 88 min 360 hektardır. Yaranma tarixinə görə üçüncü sayılan Qızılağac qoruğu Azərbaycan ərazisindəki qoruqların ən böyüyüdür. Qoruğun sahəsi təbii landşaft baxımından rəngarəng və müxtəlifdir. 58,4 faiz ərazi su akvatoriyası, 20,3 faiz cəngəllik, 21,3 faiz isə quru düzənliklərdir. Məhz bu keyfiyyəti ərazidə su, bataqlıq, quru mühitə alışan müvafiq heyvan və quş növlərinin məskunlaşmasına şərait yaradır.
Qızılağaca hər il yazda yuva qurmaq üçün Şərq ölkələrindən qaranazlar, ərsindimdiklər, sarı və ağ vağlar, misir vağlar və s. uçub gəlir. Burada turac, soltan toyuğu, qızılqaz, bəzgək, çay ördəkləri, qaşqaldaqlar, qu quşları və s. məskunlaşmışdır. Ərazidə məskunlaşmış 20-dək quş növünün adı Azərbaycanın “Qırmızı kitab” ına daxil edilib. Təbiətinin rəngarəngliyi, bitki və əsasən də heyvanat aləminin zənginliyi, əraziyə çox sayda yerli və xarici turistlərin gəlişini nəzərə alaraq, Qızılağac Dövlət Təbiət Qoruğu, Qızılağac Dövlət Təbiət Yasaqlığı və ona bitişik ərazilərin sahəsi genişləndirilərək 1 milyon hektar ərazidə Azərbaycanın yeganə dənizkənarı milli parkı yaradılıb.
1 saylı Regional Ekologiya və Təbii Sərvətlər İdarəsinin rəisi Ceyhun Hüseynov dedi:
– Biz ərazidə yerləşən təbiət subyektlərinə təkcə nəzarət etmirik, eyni zamanda, ekoloji biliklərin təbliği istiqamətində tədbirlər həyata keçiririk. İdarəmizin əməkdaşları mütəmadi olaraq müəssisələrdə, o cümlədən Qızılağac Milli Parkında məktəblilərin, geniş əhali kütləsinin iştirakı ilə ekoloji mövzuda mühazirələr oxuyur, tədbirlər keçirirlər. Milli Parkda keçiriləcək “Flaminqo festivalı”na isə xüsusi hazırlaşırıq. Parkın yaradılmasının 5 illiyinə həsr olunan bu tədbirdə ekoloji biliklər təbliğ olunacaq, ərazidə geniş abadlıq işləri görüləcək, müxtəlif ağaclar əkiləcək, mövcud yaşıllıqlara aqrotexniki qaydada qulluq göstəriləcək.
Sonda bildirək ki, Qızılağac təbiət ərazisinin respublika milli parkları ailəsinə daxil olmasından cəmi 5 il keçsə də, ərazidə geniş abadlıq, yaşıllaşdırma işləri görülüb, parkın ekoloji mühiti qorunub, daha da zənginləşdirilib. Ekoturizmin inkişafı üçün yeni imkanlar açılıb. İndi Qızılağac parkı müxtəlif ekoloji tədbirlərin ünvanına çevrilib. Qarşıdakı “Flaminqo festivalı” isə milli parkın 5 illiyinə həsr olunub. Bu təbiət bayramı əsrarəngiz Cənub təbiəti barədə yeni ekoloji təsəvvür və xoş təəssüratla yadda qalacaq.
Bəxtiyar HÜSEYNOV,
Azərbaycan Yazıçılar və Jurnalistlər birliklərinin üzvü, yazıçı-ekoloq