Türkiyə Böyük Millət Məclisinin (TBMM) sədri “Terrorsuz Türkiyə” parlament qrupunun yaradılacağı anonsunu verib. Onun sözlərinə görə, qrupun məqsədi terror probleminin tam aradan qaldırılmasına töhfə vermək olacaq.
AZƏRTAC xəbər verir ki, Numan Kurtulmuş Brüsseldə jurnalistlərlə söhbətində yeni parlament qrupunun TBMM-nin yaz sessiyası başa çatana qədər yaradılacağını deyib.
“Bu gün terrorizm təhlükəsini Türkiyənin gündəmindən çıxarmaq üçün tarixi fürsət yaranıb və bundan istifadə edilməlidir”, - deyən parlamentin spikeri terror kartından on illərdir Ankaraya qarşı istifadə olunduğunu xatırladıb.
O, Türkiyə vətəndaşlarının milli və dini zəmində parçalanmasının yolverilməzliyini qeyd edib və ölkədə ictimai birliyin gücləndirilməsinə çağırıb.
Ramin Abdullayev
AZƏRTAC-ın xüsusi müxbiri
Ankara
