Avrasiya İqtisadi İttifaqı (Aİİ) və Avropa İttifaqında (Aİ) eyni vaxtda olmaq mümkün deyil, amma harada olmağın daha yaxşı olacağına qərar vermək Ermənistanın işidir. Bu barədə RİA Novosti-yə Rusiya xarici işlər nazirinin müavini Mixail Qaluzin məlumat verib. Xəbəri “Anadolu” yayıb.
“Biz əminik ki, Aİİ və Avropa İttifaqı kimi eyni anda iki əks assosiasiyada olmaq mümkün deyil”, - Qaluzin bildirib.
O hesab edir ki, Aİİ bərabərhüquqlu dövlətlərin birliyidir, Aİ isə “gerçəklikdən uzaq olan Brüssel bürokratları tərəfindən qoyulmuş anti-Rusiya rəvayətlərinə tabe olan çubuq intizamının hökm sürdüyü” strukturdur.
“Harada olmağın daha yaxşı olduğuna qərar vermək rəsmi İrəvandan asılıdır. Ümid edirik ki, Aİİ üzvlüyünün bütün faydaları və Aİİ-dən ayrılmanın itkilərinin miqyası Ermənistan cəmiyyətinə izah ediləcək ki, Ermənistan cəmiyyətində reallıq haqqında obyektiv təsəvvür yaransın”, - nazir müavini qeyd edib.
O əlavə edib ki, Ermənistan öz inkişaf vektorunu müstəqil seçən suveren dövlətdir. Eyni zamanda Qaluzin qeyd edib ki, Rusiya və Ermənistan bütün cari məsələləri səmimi şəraitdə müzakirə edirlər: “Biz Ermənistanla müttəfiq və strateji tərəfdaşıq. Ona görə də açıqlıq və etimad şəraitində gündəliyimizdəki bütün cari məsələləri müzakirə edirik”.
Martın 26-da Ermənistan parlamenti ölkənin Avropa İttifaqına daxil olmaq niyyəti ilə bağlı qanun layihəsini ikinci və yekun oxunuşda qəbul edib. Daha sonra Rusiya baş nazirinin müavini Aleksey Overçuk bəyan edib ki, İrəvan Aİİ və Aİ arasında seçim etməli olacaq, çünki “hər iki kürsüdə oturmaq mümkün olmayacaq”.
P.ƏMİRCANOV
XQ
