Yaxın Şərq uzun onillər boyu siyasi və hərbi baxımdan planetimizin ən həssas nöqtələrindən biri olub. Son illər isə bura, hətta, qlobal siyasətin tarıma çəkildiyi bir məkana çevrilib. Bölgədəki gərgin proseslərin nəticəsi yeni dünya nizamına öz təsirini göstərə bilər.
Yaxın Şərqin “qaynar qazan”a çevrilməsi heç də səbəbsiz deyil. Belə ki, regionda dini, etnik, ərazi iddiaları zəminində onillər boyu həllini tapmayan bir çox ciddi problemlər mövcuddur. Onları ədalətli şəkildə çözmək, hələlik, heç cür mümkün olmur. Düzünə qalsa, buna heç cəhd də edilmir.
Ötən il oktyabrın 7-də HƏMAS-ın İsrailə qəfil hücumu və bu zaman törətdiyi ağır zorakılıqlar regionu və bütün dünyanı yenidən şoka saldı. İsrail hökumtəi isə artıq dörd aya yaxındır ki, qarşı tərəfi cəzalandırmaqla məşğuldur. Təəssüf ki, Təl-Əviv bu zaman heç də real vəziyyətə adekvat olmayan, aşırı hərbi zərbələrə əl atır. Təbii ki, dünya ictimaiyyəti bundan hiddətlənir, lakin bölgənin “qan axan” yaralarına çarə tapa bilmir.
Yaxın Şərqdə qarşıdakı qısa müddət ərzində silahlar susmasa, müharibə alovu qonşu ölkələri də ağuşuna alacaq. Nəticədə, Üçüncü Dünya müharibəsi qaçılmaz olacaq. Bu, qorxulu perspektiv “iki vur iki qədər” hər kəsə aydındır. Regionda zorakılıqları durdurmaq üçün qabaqlayıcı addımlar bu gün atılmalıdır, çünki sabah gec olacaq.
Yaxın Şərqdə maraqları olan böyük güclər yalnız sözdə münaqişənin həlli üçün “çalışırlar”. Amma bir dövlət var ki, o, bölgədə ədalətli sülhün bərqərar olunması üçün əlindən gələni edir. Bu, qardaş Türkiyə dövlətidir.
Ankara regionda baş verən təhlükəli proseslərin fərqindədir və hadisələrin daha ağır məcraya yönəldilməməsi üçün gərgin diplomatik səylərini ortaya qoyur. Bir çox siyasi təhlilçilər Türkiyənin regionda “ildırımötürən” funksiyasını yerinə yetirdiyini xüsusi qeyd edirlər.
Bu, həqiqətən, belədir. Prezident Rəcəb Tayyib Ərdoğan bir neçə gün əvvəl bir günlük rəsmi səfərlə Ankaraya gələn iranlı həmkarı İbrahim Rəisi ilə apardığı müzakirə zamanı regionda vəziyyətin nəzarətdən çıxmaması üçün bütün müsəlman dövlətlərini, eləcə də Tehranı səylərini birləşdirməyə çağırıb. İran lideri də ölkəsinin münaqişənin ədalətli həllində maraqlı olduğunu qeyd edib.
Bu məqamda Yaxın Şərqin digər bölgələrində cərəyan edən gərgin hadisələrə qısa da olsa nəzər salmağa ehtiyac duyuruq. Məlumdur ki, son günlər ABŞ və Böyük Britaniya bir neçə dəfə Qırmızı dənizdə İranın dəstəklədiyi Husilər Hərəkatının hərbi və mülki obyektlərinə hava zərbələri endirib.
Xatırladaq ki, husilər Qəzzadakı zorakılıqlara etiraz olaraq Qırmızı dənizdə Qərb dövlətlərinin gəmilərinə hücum edirlər. Dünyada dəniz yolu ilə daşınan malların təqribən 10 faizi Qırmızı dənizin payına düşür. Qərb dövlətlərinin ciddi xəbərdarlıqlarına baxmayaraq, husilər geri çəkilmək niyyətində deyillər.
Bu müddət əvvəl İranın öz qonşusu Pakistanda bəlucların mövqelərinə gözlənilmədən hava hücumları, ardınca qarşı tərəfin “güzgü effektli” cavab zərbələrindən sonra bir daha bəlli oldu ki, adicə bir qığılcım bu gün “barıt çəlləyi”nə bənzəyən Yaxın Şərqi ağır fəsadlara aparan müharibəyə sürükləyə bilər.
Türkiyənin təhlükəsizlik orqanları İraqın şimalında və Suriyada PKK terrorçularına və onun digər qanadı olan YPG yaraqlılarına qarşı vaxtaşırı antiterror əməliyyatları həyata keçirməyə məcbur olurlar. Ankara faktiki olaraq bir çox böyük güclərin arxasında durduqları və silahlandırdıqları terrorçuların bölgədə “qol-qanad” açmasına imkan vermir.
Təəssüf ki, Ankara bu humanist missiya üçün digər müsəlman ölkələrindən lazımi dəstəyi ala bilmir.
Şahbaz ŞAMIOĞLU,
filologiya elmləri doktoru, professor
Türkiyənin regionda stabil və humanist xarici siyasət yürütməsi bu ölkənin humanizm dəyərlərinə sadiqliyini nümayiş etdirir. Bu siyasi kurs hələ dahi qurucu lider Mustafa Kamal Atatürkün vaxtında müəyyən olunub. Türk millətinin və dövlətinin böyük xilaskarı “Yurdda sülh, cahanda sülh” demişdir. O dönəmdən Türkiyə bu gərgin bölgədə sülhün əsas qarantı kimi çıxış edir.
Son vaxtlar Yaxın Şərqdə gərginliyin kritik vəziyyətə çatdığı bir vaxtda İran Prezidenti İbrahim Rəisinin Ankaraya səfəri böyük əhəmiyyət kəsb edir. Bəzi analitiklər haqlı olaraq hesab edirlər ki, Qəzza problemi Ankara və Tehranın mövqelərini bir çox istiqamətlərdə, xüsusilə regionun təhlükəsizliyi məsələsində yaxınlaşdırıb.
Lakin Yaxın Şərqin iki böyük dövləti olan Türkiyə və İranın Suriya rejiminə münasibətdə mövqeləri haçalanır. Belə ki, Ankara Bəşər Əsəd rejimi ilə danışıqlar aparmağın mənasız olduğunu bildirir, Tehran isə bu məsələdə tamamilə əks mövqe nümayiş etdirir və rəsmi Dəməşqə Rusiya ilə birlikdə hər cür dəstək verir.
Xatırladaq ki, İran və Türkiyənin 535 kilometr ümumi sərhədi var və bu iki böyük dövlət arasında tarixən çox sıx iqtisadi və diplomatik əlaqələr olub. Təqdirəlayiq haldır ki, tərəflərin heç biri 1639-cu ildə İranda imzalanan “Qəsr Şirin” sülh müqaviləsini pozmayıb.
Ankara regionda münaqişənin genişlənməsinin qarşısını almaq naminə böyük diplomatik səylər ortaya qoyur, bu müdrik və humanist siyasət dünya ictimaiyyəti tərəfindən təqdir olunur.
M.HACIXANLI
XQ