“Avropa İttifaqı (Aİ) və Çin yaxın vaxtlarda açıq ticarət qarşıdurmasına başlaya bilər”. Bu sözləri Brüsseldəki yüksək çinli məmurlardan biri “South China Morning Post” nəşrinə müsahibə verərkən açıqlayıb. İllərlə yığılıb qalan ziddiyyətləri aradan qaldırmaq üçün tərəflərdən heç biri prinsipial güzəştə getmək fikrində deyil. Bununla belə Çin hələ də Aİ-nin əsas ticarət tərəfdaşlarından biri olaraq qalır.
Nəşrin qeyd etdiyinə görə, Aİ rəhbərləri ÇXR Dövlət Şurasının sədri Li Çyanın bu günlərdə Davos Ümumdünya İqtisadi Forumunda çıxışı zamanı dünyaya açıq olmaq siyasəti haqqında dediklərindən heç də razı qalmamışlar. Bununla yanaşı, Li sonra İrlandiyaya rəsmi səfər edib və bu ölkənin ÇXR-ə gələn vətəndaşları üçün birtərəfli vizasız rejimin tətbiqini elan edib, həmçinin İrlandiyanın mal əti tədarükünə qoyulmuş qadağanın aradan qaldırılmasına razılıq verib. Brüssel bütün bunları “döyüşkən və müdafiə olunmağa qalxan” Çinin ABŞ-da seçkilərin keçirilməsinə qədər vaxtı uzatmaq arzusu kimi qiymətləndirib.
Aİ liderlərinin Pekinin ünvanına səsləndirdikləri iqtisadi ittihamlar arasında əsas maddə 200 milyard avroluq ticarət “disbalans”ıdır. Onların sözlərinə görə, Avropa məhsullarının Çin bazarlarına buraxılmaması və ÇXR hökuməti tərəfindən Avropa bazarını dolduran elektrik avtomobillərinin və başqa məhsulların istehsalının subsidiyalaşdırmasıdır.
2023-cü ildə Pekin üçün ikinci böyük ticarət tərəfdaşı olan Aİ ilə Çinin mal dövrüyyəsi 782,9 milyard dollar təşkil edib. Ötən ilin nəticələrinə görə ÇXR-in birlik ölkələrinə ixracı 500 milyard dollardan bir qədər çox, Aİ-dən idxal isə 281,7 milyard dollar təşkil edib.
Doğrudur, bütün kəskin məsələlər 4 ildə ilk dəfə 2023-cü ilin dekabrında tərəflər arsında yüksək səviyyədə keçirilən əyani sammitdə müzakirə olunub, ancaq bu, nəticəsiz başa çatıb. O zaman Avropa Komissiyasının sədri Ursula fon der Lyayen ÇXR sədri Si Cinpini xəbərdar edib ki, Aİ-nin ixtiyarında “öz bazarını qorumaq üçün aləti var”. O, hətta çinlilərin Avropanın tibbi avadanlıqlar bazarına girişini məhdudlaşdıran (bu sektorda Çin Aİ-ni öz bazarına buraxmır) tədbirlər həyata keçirməyə hazır olduğunu da bildirib.
Belə iddia edilir ki, bütün bu xəbərdarlıqlara cavab olaraq Si Cinpin Aİ liderlərinə məsləhət görüb ki, 2018-ci ildə Çinə ticarət müharibəsi elan edən, lakin nəticədə “uğursuzluğa məruz qalan” ABŞ-ın keçmiş prezidenti Donald Trampın təcrübəsini öyrənsinlər. Hətta onu da əlavə edib ki, əgər Avropa analoji müharibə aparmaq qərarına gəlsə, o zaman “Köhnə qitə”ni də eyni tale gözləyir. Avropa liderlərinin yeni tədbirlər tətbiq edəcəkləri ilə bağlı hədələrinə cavab olaraq Çin lideri buna qarşılıqlı tədbirlərlə cavab veriləcəyini vəd edib. Çinin istehsal sektorunda uğurlarına gəldikdə isə Si bunun subsidiyalarla deyil, ÇXR məhsullarının səmərəliliyi və rəqabətqabiliyyətliyi ilə bağlı olduğunu bildirib. Aİ-nin yüksək çinli məmuru bu tərz danışıqları “ticarət müharibəsinin resepti” hesab edir.
Yanvarın sonunda Aİ yenilənmiş iqtisadi təhlükəsizlik strategiyasını təqdim edəcək ki, son dərəcə vacib olan sahələri Çin və Rusiya tərəfindən ediləcək investiya nəzarətindən qorusun. “Bloomberg”in yazdığına görə, qəbul edilən tədbirlər birliyin “dəyərlərini bölüşməyən” tərəfdaşlarla münasibətlərdə “Aİ-nin iqtisadi təhlükəsizliyi üçün yarana biləcək riskləri” aradan qaldırmağa yönəldiləcək. Kritik texnologiyaların siyahısına yarımkeçiricilər, süni intellekt və biotexnologiya daxildir.
Mümkün tədbirlər dairəsinə birbaşa xarici investisiyaların təşviqi qaydalarının sərtləşdirilməsi, ixraca nəzarətin əlaqələndirilməsi, həmçinin “xarici investisiyalar vasitəsilə Aİ-nin rəqiblərinə həssas “nou-hau”nun sızmasına nəzarət etmək üçün yeni mexanizmin işlənib hazırlanması daxildir. Bununla belə, Aİ-yə üzv olan bəzi dövlətlərin Brüsselə daha da çox səlahiyyətlər vermək və Çinlə ticarət müharibəsi cəbhəsini açmaq istəməməsi səbəbindən, sənədə hüquqi qüvvəyə malik heç bir norma daxil edilməyəcək.
Ekspertlər hesab edirlər ki, Çin və Aİ arasında münasibətlərin dinamikasını nəzərdən keçirərkən, diqqəti yalnız son illərin siyasi hadisələri üzərində cəmləmək doğru olmazdı. Çünki Aİ hələ 2010-cu illərdə Çinin dövlət subsidiyaları vasitəsilə yüksək texnologiyalı sənayenin sürətləndirilmiş inkişafı proqramları ilə bağlı ciddi narahatlıqlar hiss etməyə başlayıb. Məhz bu müstəvidə tərəflər arasında münasibətlər mürəkkəbləşməyə başladı, çünki ABŞ-dan fərqli olaraq, Aİ innovasiyalar sahəsində effektiv siyasət yürütmək iqtidarında deyil. Aydın məsələdir ki, əgər Brüssel mövcud tendensiyalarla bağlı heç nə etməsə, Avropa getdikcə daha çox itirəcək və Çin onun bazarlarını ələ keçirəcək. ÇXR güzəştə getmir, çünki ona da öz yüksək texnologiyasını qorumaq lazımdır.
Bununla yanaşı, çinlilər öz üsullarından istifadə edərək, xüsusən də ikitərəfli diplomatiya yolu ilə avropalılarla münasibətlərə təsir göstərməyə çalışırlar. Məsələn, Fransa prezidenti Emmanuel Makronun 2023-cü ildə Çinə səfəri zamanı tərəflər arasında müxtəlif sənaye sahələri üzrə bir neçə milyard dollar dəyərində 14 müqavilə imzalandı və yalnız bundan sonra fransalı qonaq Avropanın strateji muxtariyyətinin əhəmiyyətindən danışmağa başladı.
Əslində indi çinlilər, həqiqətən də okeanın o tayındakı seçkilərin nəticələrini gözləyirlər və ümid edirlər ki, bu seçkilərdən sonra orada Transatlantik həmrəylik zəifləyəcək və hadisələr siyasi elitaların yenilənməsinə gətirib çıxaracq.
Son illərdə Çinin Aİ liderləri ilə “güclü tərəf” mövqeyindən danışması aydın müşahidə edilməkdədir. Elə bu da ticarət müharibəsinin qarşısını almağa kömək edir, lakin belə davranışın qismən lazımsız çətinliklərə gətirib çıxarması da faktdır. Məsələn, 2020-ci ilin sonunda tərəflər çox çətinliklə Hərtərəfli İnvestisiya Sazişinin şərtlərini razılaşdıra bildilər, lakin sonra Çin Avroparlamentin Sincanda insan haqları ilə bağlı qəbul etdiyi qətnaməyə görə qurumun deputatlarına qarşı sanksiyalar tətbiq etdi və bu, sənədin paraflamasının “asılı vəziyyət”də qalmasına səbəb oldu. Bundan əlavə, analitiklər hesab edirlər ki, ÇXR liderlərinin Ursula fon der Leyenlə mürəkkəb şəxsi münasibətləri də öz rolunu oynadı. Lakin indi Avropa Komissiyasının yeni rəhbəri münasibətlərin istiləşməsinə kömək edə bilər.
Bu gün Aİ-nin istifadə edə biləcəyi mümkün məhdudlaşdırıcı vasitələr arasında tarifləri, ixrac nəzarətini və onun şərtlərini pozan Avropa şirkətlərinə dövlət dəstəyinin ləğvini qeyd edirlər. Bütün hallarda Çinlə ticarət müharibəsi baş verərsə, (hərçənd bu o qədər də real görünmür) o zaman ən böyük zərər Avropa iqtisadiyyatının yüksək texnologiyalar sektoruna dəyəcək.
Hazırladı:
İlqar RÜSTƏMOV
XQ