Yupiterdə əvvəllər məlum olmayan, eni 4800 kilometrdən çox olan reaktiv axın aşkar edilib. Bu axın Yerdəki ən güclü qasırğalardan iki dəfə sürətlə hərəkət edir. NASA-nın məlumatına görə, o Yupiterin ekvatorunda, onun əsas bulud təbəqələrinin üstündə yerləşir. Alimlər etiraf edirlər ki, reaktiv axının mövcudluğu faktı onları çox təəccübləndirib. Onun kəşfi Yupiterin turbulent atmosfer təbəqələrinin bir-biri ilə necə qarşılıqlı əlaqədə olduğuna dair yeni fikirlər verir.
Yeni kəşf edilmiş reaktiv axın olduqca yüksək sürətlə hərəkət edir. Bu, saatda təxminən 515 kilometrdir. Hesablamalar göstərib ki, reaktiv axın Yupiterin əsas buludlarından təxminən 40 kilometr yüksəklikdə yerləşir. Əlavə müşahidələr bu axının sürətinin və hündürlüyünün zamanla dəyişib-dəyişmədiyini müəyyən edəcək.
Tədqiqatçıların nəticələri ilə “Nature Astronomy” jurnalında tanış olmaq olar.
P.ƏFƏNDİ
XQ