ABŞ-nin sabiq prezidenti Donald Tramp həbs edilib və daha sonra girov müqa­bilində Corciya ştatındakı Fulton həbsxanasından sərbəst buraxılıb. Girov məb­ləği 200 min dollar təşkil edib. O, təxminən, 20 dəqiqə həbsdə olub, orada onun şəkli də çəkilib, bundan sonra korteji Atlantadakı Hartsfild-Cekson Beynəlxalq Aeroportuna yola düşüb.

Donald Tramp burada mətbuat üçün bir neçə bəyanat verib. Qanunsuz heç bir şey etmədiyini israr edən sabiq prezident iddiaları “ədalətin parodiyası” adlandırıb.

Xatırladaq ki, Corciya ştatının rəhbər­liyi Trampı ştatda 2020-ci ildə keçirilmiş prezident seçkilərinə müdaxilə etməkdə ittiham edir. Tramp ölkənin hazırkı prezi­denti Cozef Baydenə uduzduğunu inkar edib və bu ştatda səsvermənin nəticələri­nin ləğv edilməsini tələb edib. 

Bu arada ABŞ-ın keçmiş prezidenti Donald Tramp seçkiqabağı kampaniyası üçün 72 milyon dollardan çox vəsait top­layıb. Bu, istənilən respublikaçı rəqibinin topladığı vəsaitdən bir neçə dəfə çoxdur. Bu barədə “Bloomberg” agentliyi ABŞ Federal Seçki Komissiyasının məlumat­larına istinadən xəbər yayıb.

Florida qubernatoru Ron Desantis in­diyədək cəmi 17,2 milyon dollara yaxın, ABŞ-ın BMT-dəki keçmiş səfiri Nikki Heyli isə 13,9 milyon dollar toplaya bilib. Trampın dövründə ABŞ-ın vitse-prezi­denti olmuş Mayk Pens isə cəmi 888 min dollar yığa bilib.

Donorların sayına görə də Tramp liderlik edir – təxminən 450 min nəfər müxtəlif məbləğdə ianələri respublikaçı liderə köçürüb. Ən yaxın təqibçisi Desan­tisdə bu rəqəm 86 min civarındadır. Eyni zamanda, Tramp kampaniyasına ianə edənlərin 92 faizi prezidentlik yarışının digər iştirakçılarına maddi dəstək göstər­məyib.

CBS tenekalı və “YouGov” şirkəti tərəfindən avqustun 16-18-də sorğu ke­çirilib. Sorğuya görə, keçmiş prezident Trampın Respublikaçılar Partiyasının tərəfdarları arasında mövqeyi ona qarşı irəli sürülən ittihamlar fonunda güclənib. Respondentlərin 62 faizi Trampı pre­zidentliyə namizəd kimi seçəcəklərini cavablandırıb. İkinci yerdə 16 faiz səslə Florida qubernatoru Ron Desantis qərar­laşıb. Beləliklə, Trampla onun əsas rəqibi arasında fərq 46 faiz təşkil edib. İyul ayı ilə müqayisədə bu göstərici 8 faiz artıb.

Qeyd edək ki, ABŞ-da növbəti prezi­dent seçkiləri 2024-cü ilin noyabrında ke­çiriləcək. ABŞ-ın hazırkı prezidenti, de­mokrat Co Byden aprel ayında yenidən seçilmək niyyətində olduğunu açıqlayıb.

Ə.PÜNHAN, “Xalq qəzeti”