Ankara–Budapeşt tandemi Qərbdə qısqanclıq yaradır
Ötən bazar günü Türkiyə Prezidenti Rəcəb Tayyib Ərdoğan Macarıstanın Baş naziri Viktor Orbanın dəvəti ilə Budapeştdə səfərdə olub və bu ölkənin milli bayramı ilə bağlı təşkil olunmuş bir çox mühüm tədbirlərdə iştirak edib. Dünya mediası bu hadisəni geniş işıqlandıraraq, son illər iki ölkə arasında xüsusi münasibətlərin yarandığını qeyd edib.
“The Deyli Newspaper” qəzeti yazır ki, Türkiyə və Macarıstan liderləri əvvəlcə bağlı qapılar arxasında görüşərək bir çox aktual ikitərəfli məsələləri, eləcə də regional və beynəlxalq problemləri müzakirə ediblər.
Xatırladaq ki, Türkiyə–Macarıstan stateji əməkdaşlığı barədə sənəd 2013-cü ildə imzalanıb və o dövrdən iki ölkə arasında hərtərəfli əməkdaşlıq güclənib. R.T.Ərdoğan özünün “Teleqram” səhifəsində qeyd edib ki, Türkiyə ilə Macarıstan arasında 2022-ci ildə ticarət dövriyyəsinin həcmi 3,5 milyard dollar təşkil edib. Tərəflər bu göstəricinin yaxın iki-üç il ərzində 6 milyard dollara çatdırmaq əzmindədir.
Türkiyə Prezidenti Budapeştdə Azərbaycan, Özbəkistan, Qırğzıstan, Bosniya-Herseqovina və Serbiya liderləri ilə də görüşlər keçirib. Serbiya Prezidenti Aleksandr Vuçiç bəyan edib ki, cənab Ərdoğanla Budapeştdə baş tutan görüş Serbiya–Türkiyə münasibətlərinin möhkəmlənməsi prosesində növbəti addımdır”. Onun sözlərinə görə, Ərdoğanla ikitərəfli və regional aktual məsələlər ətrafında mühüm və açıq söhbət olub.
A.Vuçiç qeyd edib ki, ölkəsi üçün Ankara ilə mümkün olan ən yaxşı münasibətləri saxlamaq vacibdir və bu görüş qarşılıqlı maraq doğuran bütün sahələrdə onsuz da yaxşı olan Serbiya–Türkiyə əməkdaşlığının gücləndirilməsi istiqamətində növbəti addım idi.
Macarıstandan qayıdan Türkiyə Prezidenti Rəcəb Tayyib Ərdoğan təyyarədə jurnalistlərə müsahibəsində deyib ki, İsveçin NATO-ya üzvlük protokollarının Türkiyə Böyük Millət Məclisinə (TBMM) göndərilməsi və prosesin həlli bu ölkənin vədlərinə sadiq qalmasından asılıdır.
Onun sözlərinə görə, bu məsələyə Türkiyə parlamenti qərar verəcək: “Məsələnin parlamentimizdə nə qədər müzakirə olunacağını bilmirik. İsveç hər şeydən əvvəl Stokholm küçələrinə nəzarət etməlidir. Əgər bunu etməsələr, müqəddəs saydıqlarımıza hücum etsələr, onda inciməsinlər”.
Türkiyə liderini Macarıstan səfəri zamanı qardaş ölkənin xarici işlər naziri Hakan Fidan, enerji və təbii sərvətlər naziri Alparslan Bayraktar, gənclər və idman naziri Osman Askın Bak, sənaye və texnologiyalar naziri Mehmet Fatih Kacır, ticarət naziri Ömər Bolat, Prezident Administrasiyasının Kommunikasiya İdarəsinin rəhbəri Fəxrəddin Altun və baş müşavir Akif Cağatay Kılıc müşayiət edib.
Yeri gəlmişkən, dünən Türkiyədə Prezident R.T.Ərdoğanın rəhbərliyi ilə Nazirlər Kabinetinin iclası keçirilib. “Haber Global” telekanalı xəbər verib ki, toplantıda daxili məsələlər, inflyasiya və xarici siyasətin prioritetləri müzakirə olunub.
Bildirilib ki, iclasda regional məsələlər barədə fikir mübadiləsi aparılıb. Rusiya–Ukrayna müharibəsi və “Taxıl sazişi”nin bərpası məsələsi, eyni zamanda, Şimali Kiprlə BMT sülh missiyası arasındakı gərginlik də müzakirə edilib. Toplantıdan sonra Ərdoğan jurnalistlərə açıqlama verib.
Türkiyə Prezidenti Budapeşt səfəri haqqında da danışıb və orada aparılan müzakirələrin faydalı olduğuna əminliyini ifadə edib.
Həmid VƏLİYEV,
BDU-nun “Beynəlxalq jurnalistika” kafedrasının professoru
– Türkiyə–Macarıstan münasibətləri xüsusi münasibətlərdir. Yəni, dünyada xüsusi münasibətləri olan bir neçə dövlət var. Məsələn, Böyük Britaniya və Amerika Birləşmiş Ştatlarının münasibətləri xüsusi münasibətlərdir. Belə ki, bu ölkələr təkcə strateji baxımdan deyil, həm də milli maraqlar, etnik baxımdan bir-birinə çox yaxın dövlətlərdir.
Fikir veribsinizsə, Amerikanın hər bir yeni prezidenti Böyük Britaniyaya münasibətdə iki dövlət arasında xüsusi münasibətlərin olduğunu vurğulamağa çalışır. İki qardaş ölkə–Türkiyə–Azərbaycan münasibətləri də belədir. Türkiyənin xoşbəxtlikdən təkcə Azərbaycanla deyil, Orta Asiyanın türk dövləltləri, eləcə də Macarıstanla xüsusi münasibətləri formalaşıb.
Qeyd etmək lazımdır ki, Türkiyə Prezidenti Rəcəb Tayyib Ərdoğan ilə Macarıstanın Baş naziri Viktor Orban arasında çox yaxın, şəxsi dostluq münasibətləri mövcuddur. Macarıstan Avropa İttifaqının və NATO-nun üzvüdür. Bununla bərabər, öz milli maraqlarına uyğun müstəqil siyasət xətti həyata keçirir.
Macarıstan Türkiyənin Aİ üzvlüyünə namizədliyini birmənalı şəkildə dəstəkləyir. NATO-nun genişlənməsi ilə bağlı məsələdə də Türkiyə–Macarıstan mövqeləri bir-birinə yaxınlığı ilə seçilir. V.Orban dəfələrlə deyib ki, Türkiyə nə vaxt İsveçin alyansa üzv qəbul edilməsinə “yaşıl işıq” yandırsa, biz də “hə” deyəcəyik.
Sirr deyil ki, bir sıra Avropa ölkələrinin liderləri Ankara–Budapeşt yaxınlığına qısqanclıqla yanaşır. Onlar bunun səbəbini bəzən başa düşmürlər. Səbəb isə odur ki, macarlar etnik cəhətdən türklərə çox yaxındırlar. Hunlar qədim türk qövmüdür. Bundan başqa, V.Orban böyük siyasətçi olaraq R.T.Ərdoğanın şəxsiyyətinə dərin ehtiram bəsləyir.
Ümid edirik ki, V.Orbanın Türkiyə Prezidentinə, bütövlükdə, türk dünyasına “isti” münasibəti Böyük Turançılıq ideyasının reallaşmasına, türk toplumları və xalqları sıx əlaqələrin genişlənməsinə də böyük fayda verir.
Yeri gəlmişkən, həm türk, həm də macar mətbuatı liderlərin Budapeştdə təşkil olunan görüşü, xüsusilə türkdilli dövlətlərin rəhbərlərinin Macarıstana səfərini geniş işıqlandırırlar.
Macarıstan mətbuatı dəfələrlə Türkiyənin daxili və xarici siyasətini dəstəkləyən analitik yazılar dərc edib. Macarlar zəmanəmizin ən görkəmli dövlət xadimlərindən olan R.T.Ərdoğanın şəxsiyyətinə böyük maraq göstərirlər.
Ceyran CƏFƏRLİ,
Məsaim ABDULLAYEV,
“Xalq qəzeti”