12 konqresmen Ukraynaya yeni hərbi yardıma etiraz edib
Respublikaçı konqresmenlər ABŞ Prezidenti Co Baydendən Ukraynaya 24 milyard dollarlıq yardım üçün yeni maliyyə tələbini geri götürməsini tələb ediblər. Bu barədə Nümayəndələr Palatasının üzvü Varren Davidson bildirib. “Fox News” siyasətçilərdən sitat gətirib: “Biz Ukrayna üçün 24 milyard dollar da daxil olmaqla, 40 milyard dollarlıq əlavə vəsaitin ayrılması ilə bağlı son müraciətinizlə kəskin şəkildə razılaşmadığımızı bildiririk”.
Baydenin təşəbbüsünə 12 konqresmen qarşı çıxıb. Məktubda deyilir ki, bu sorğu "administrasiyanızın nəzarətsiz kəsir xərclərini gücləndirir və ikipartiyalı “borc tavanı” razılaşmasını pozur: “Amerikalılar sonsuz müharibələri maliyyələşdirməkdən yorulub və Vaşinqtonda nəinki maliyyə ehtiyatlığını bərpa etməyə kömək edəcək, həm də Amerikanı və Amerika vətəndaşlarını birinci yerə qoyacaq siyasət istəyirlər”. ABŞ-ın Ukraynadakı məqsədləri aydınlaşana qədər vəsait tələbinin geri götürülməsi təklif edilir.
Pentaqonun məlumatına görə, Rusiyanın Ukraynada xüsusi əməliyyatı başlayandan bəri, Vaşinqton Kiyevə 43 milyard dollardan çox hərbi yardım ayırıb. ABŞ səlahiyyətliləri əvvəlki paketi iyulun sonunda açıqlamışdı. Onda maliyyələşmənin həcmi 400 milyon dollar olub.
“The Washington Post”un yazdığına görə, Kiyev ötən il fevralın 24-dən ABŞ-dan təxminən 66,2 milyard dollar hərbi, maliyyə və humanitar yardım alıb. Bu da Vaşinqtonun İkinci Dünya müharibəsindən sonra başqa bir ölkəyə verdiyi ən böyük dəstəkdir.
Nümayəndələr Palatasının digər üzvü Qreq Stubi (Florida ştatından olan respublikaçı) isə Konqresdə ABŞ Prezidenti Co Baydenin impiçmenti ilə bağlı məsələ qaldırıb. Onu prezident kürsüsünü nüfuzdan salmaqda və qanunun aliliyini pozmaqda ittiham edib. Bu barədə cümə günü konqresmenin saytında dərc olunmuş bəyanatda deyilir. “Co Baydenə impiçment elan etməyin vaxtıdır. O, öz administrasiyasının dürüstlüyünə xələl gətirib, prezidentliyi nüfuzdan salıb, prezident kimi ona göstərilən etimada xəyanət edib, Amerika vətəndaşlarının zərərinə qanunun aliliyini və ədaləti pozaraq hərəkət edib. Bunun sübutu hər gün artır”.
Konqresmen daha sonra deyib ki, Baydenin cinayətkar ailəsi rüşvət, təhdid və fırıldaqçılıq yolu ilə onun dövlət vəzifələrindən istifadə edərək qazanc əldə edirlər. “Biz Co Baydenin Ağ evdə oturub ölkəmizi satmağa davam etməsinə icazə verə bilmərik”,- deyə qanunverici bildirib.
Baydenin impiçmenti ilə bağlı məqalələr ilk dəfədir ki, ABŞ Konqresinə təqdim edilmir. Qanunvericilər Marjorie Teylor Qrin (Gorciya ştatından respublikaçı) və Loren Bobert (Koloradodan respublikaçı) bu təşəbbüslə əvvəllər dəfələrlə çıxış ediblər. Nümayəndələr Palatasının spikeri Kevin Makkarti də impiçment prosesinə başlamaq niyyətini açıqlayıb. O hesab edir ki, bu, Bayden və onun ailəsinin korrupsiya sxemlərində iştirakı ilə bağlı həqiqəti öyrənməyin yeganə yoludur. Lakin bu niyyətlərin həyata keçirilməsi üçün hələ də heç bir addım atılmayıb.
Rusiya isə Ukrayna ordusunun maliyyələşdirilməsinə qarşıdır və Belarusu Ukraynadakı müharibəyə cəlb etməyə çalışır. Hərbi ekspert Sin Bell Britaniyanın “Sky nyus” nəşrində dərc olunmuş təhlilində bildirib ki, Belarus Prezidenti Aleksandr Lukaşenko NATO ilə gərginliyi artırır: “Vaqner” xüsusi hərbi təşkilatının ölkəsində yerləşməsi Lukaşenkonu daha da cəsarətləndirib. Lakin bu, Polşa ilə gərginliyin yaranması ilə nəticələndi. Belarus helikopterlərinin də sərhəd pozuntularında iştirak etdiyi barədə məlumatlar var. Bu hallar Belarusun NATO qonşuları ilə gərginliyini artıra bilər”.
Pünhan ƏFƏNDİYEV,
“Xalq qəzeti”