Azərbaycan dövlətinin siyasətində əhalinin sosial rifahı prioritet təşkil edir. Prezident İlham Əliyevin bölgələrə hər səfəri yeni sosial obyektlərin və müəssisələrin açılışları ilə yadda qalır. Dövlət başçısının bir neçə gün əvvəl ölkəmizin Qərb bölgəsinə səfəri də mühüm tarixi hadisələrlə diqqət mərkəzində oldu. Əminik ki, səfər zamanı Prezident tərəfindən açılışı edilən sosial obyektlərin hər biri fəaliyyəti ilə bölgə sakinlərinin sosial müdafiəsinin yaxşılaşdırılmasına xidmət edəcək.
Bu mənada Samux Rayon Mərkəzi Xəstəxanasının yeni binasının açılışı, xəstəxanada yaradılan şəraitlə bağlı dövlət başçısına verilən məlumat tədbiri izləyən hər kəsin diqqətini çəkdi. Bu gözəl tibb ocağının inşasına 2019-cu ildə başlanılıb. Üçmərtəbəli, 90 çarpayılıq xəstəxanada əhaliyə ən müasir tələblər səviyyəsində səhiyyə xidməti göstərilməsi üçün lazımi şərait yaradılıb. Bura müraciət edənlər Yaponiya, Koreya, İtaliya və Türkiyə istehsallı modern avadanlıqla dəqiq müayinə olunacaqlar.
Tibb müəssisəsində bütün zəruri xidmətlər üzrə şöbələr fəaliyyət göstərəcək. Ərazidə əsas bina ilə yanaşı, yoluxucu xəstəliklər korpusu və digər yardımçı binalar da inşa olunub.
Televiziya ilə izlədiyimiz kadrlardan da görünürdü ki, əhalinin müasir tibbi xidmətlə əhatə edilməsi, müayinə və müalicələrin etibarlı olması, gələcəyimiz olan uşaqların sağlam böyüməsi üçün ardıcıl surətdə tədbirlər həyata keçirilir. Sosial layihələrin icrası dövlət başçısının daimi diqqətində, ciddi nəzarətindədir.
Dövlət başçımız həmin gün Bərdədə Əmək və Əhalinin Sosial Müdafiəsi Nazirliyinin Qarabağ Regional Dayanıqlı və Operativ Sosial Təminat (DOST) və peşə hazırlığı mərkəzlərinin açılışında da iştirak edib. Bu günlərdə 5 yaşı qeyd olunan agentliyin DOST mərkəzləri artıq, sözün əsl mənasında, vətəndaşlarınn dostuna çevrilib. Onların əsas qayəsi vətəndaş məmnunluğuna nail olmaqdır. Mövcud DOST mərkəzlərində indiyədək 1 milyon yarımdan çox insana məşğulluq, əmək, əlillik və sosial müdafiə sahələrində “bir pəncərə” prinsipi ilə 15 istiqamət üzrə 159 növ xidmət göstərilib: məmnunluq dərəcəsi 98,2 faizdir.
Bərdədə DOST Mərkəzinin açılışı zamanı Əmək və əhalinin sosial müdafiəsi naziri Sahil Babayevin verdiyi məlumata görə, qarşıdakı 3 ildə belə xidmət sahələrinin sayının 17-yə, filialların isə 55-ə çatdırılması planlaşdırılır.
Yeni açılan mərkəz dördmərtəbəli, yaraşıqlı binadan ibarətdir. Burada 123 işçi çalışacaq. Eyni zamanda, “Könüllü DOST” proqramı üzrə 50 gənc fəaliyyət göstərəcək. Mərkəz 770 mindən çox əhalisi olan 9 rayona, həmin ərazilərdən sosial müdafiəyə ehtiyacı olan 170 min nəfərə xidmət edəcək. Gün ərzində orta hesabla 650–700 vətəndaşın rahat qəbulu təmin ediləcək.
Ölkənin regionlarında yaradılan peşə hazırlığı mərkəzləri də sosial rufaha xidmət edən ünvanlardır. Bildiyimiz kimi, peşə hazırlığı özlüyündə işaxtaran və işsiz şəxslərin əmək bazarının tələbatına uyğun olaraq təhsil müəssisələrində ixtisasa və ya yeni peşəyə yiyələnmək üçün hazırlığını ehtiva edir. Özü də bu zaman “Məşğulluq haqqında” Qanunun tələbləri nəzərə alınır, təlimlər isə təhsillə bağlı qanunlarına uyğun təşkil olunur. Bu baxımdan Qarabağ Regional Peşə Hazırlığı Mərkəzinin işə başlaması əmək bazarının tam təminatını reallaşdıracaq. Burada emalatxanalar, siniflər və instruksiya otağı, Karyera Planlaması Mərkəzi mövcuddur. Təlimlər 48 peşə üzrə aparılacaq. Mərkəzdə 20 nəfərlik heyət işləyəcək. Bir dəfədə 300, ildə isə 1200 nəfərin hazırlıq keçməsi nəzərdə tutulub.
Qeyd edək ki, hazırda Bakı, Göyçay və Gəncədə də peşə hazırlığı mərkəzləri fəaliyyət göstərir. Ümumilikdə, mərkəzlərdə 175 peşə və ixtisas üzrə tədris aparılır, 100-dən çox əlavə təhsil müəssisəsi ilə əməkdaşlıq həyata keçirilir. DOST konsepsiyasına uyğun olaraq, yeni mərkəzlərin yaradılması üzrə növbə Quba, Cəbrayıl, Sabirabad, Şəki, Masallı, Ucar və Şamaxınındır.
Açılış mərasimində bildirildiyinə görə, son beş ildə ölkəmizdə 1 milyondan çox şəxsə məşğulluq xidməti göstərilib, 425 min nəfər işlə təmin olunub. Həmçinin 68 min nəfər özünüməşğulluq xidməti, 20 min nəfər işsizlikdən sığorta ödənişi ilə təmin edilib, 18 min nəfər peşə hazırlığına, 473 min nəfər isə peşəyönümlü xidmətlərə cəlb olunub. Postmüharibə dövründə 19 min şəhid ailəsinin üzvü və müharibə iştirakçısı müvafiq xidmətlərdən gen-bol yararlanıb.
İşğaldan azad edilmiş ərazilərdə həyata keçirilən məşğulluq tədbirləri də təqdirəlayiqdir: artıq 129 min şəxsin təhlili aparılıb. Laçın, Füzuli rayonları, Ağalı və Talış kəndləri üzrə 2 min 257 şəxslə iş aparılır, 200-dək işəgötürənlə əməkdaşlıq münasibətləri qurulub. Şuşaya köçürüləcək 19 mindən çox şəxs öyrənilib, 56 nəfərin məşğulluğu təmin edilib.
Bəli, bütün ölkədə olduğu kimi, işğaldan azad edilən rayonlarımıza qayıdacaq sakinlərin sosial müdafiəsinin yaxşılaşdırılması məqsədilə də geniş tədbirlər planı mərhələli şəkildə reallaşdırılır.
Zərifə BƏŞİRQIZI, “Xalq qəzeti”