Rusiya taxıl razılaşmasında iştirakını yeniləməkdən imtina etdi. Bu, Ukraynadan taxıl ixrac edən gəmilərin təhlükəsiz keçidini təmin edən müqaviləni faktiki olaraq ləğv etdi. Bu barədə Britaniya Müdafiə Nazirliyi öz kəşfiyyatına istinadən yazır. İndi Rusiya Ukrayna limanlarından bütün ticarət gəmilərinin hərəkətini blokadaya almaq niyyətindədir, lakin bu, onun öz donanmasına da təhlükə yaradacaq.
Britaniya kəşfiyyatı qeyd edir ki, Rusiya Federasiyası yəqin ki, bir müddət əvvəl bu sazişin onun maraqlarına cavab vermədiyinə inanaraq, “Taxıl sazişi”ndən çıxmaq qərarına gəlib. Bununla belə, ruslar öz qərarlarını dezinformasiya ilə pərdələyirlər: Guya “Ukrayna minaları” mülki gəmilər üçün təhlükə yaradır və Ukrayna taxıl dəhlizindən hərbi məqsədlər üçün istifadə edir. Üstəlik, iyulun 19-da Rusiya Müdafiə Nazirliyi Qara dənizdən keçərək Ukrayna limanlarına üzən bütün gəmiləri potensial hərbi hədəflər hesab edir. Lakin Rusiya həmişə olduğu kimi, öz iddiasına heç bir sübut təqdim etməyib.
Ağ evin Milli Təhlükəsizlik Şurasının sözçüsü Adam Hodge isə bildirib ki, Rusiya bu bəhanələri gətirərək Qara dənizdə mülki gəmilərə hücum edə və buna görə Ukraynanı günahlandıra bilər: “Biz hesab edirik ki, bu, Qara dənizdə mülki gəmilərə qarşı istənilən hücuma haqq qazandırmaq və bu hücumlarda Ukraynanı günahlandırmaq üçün koordinasiya olunmuş cəhddir”.
Bunlar göstərir ki, Rusiya Qara Dəniz Donanması, çox güman ki, indi taxıl ticarətinin pozulmasında daha fəal rol oynayacaq. Amma Ukrayna tərəfi də hadisələrin sakit iştirakçısı olmayacaq. Qara Dəniz Donanmasının blokada əməliyyatları Ukraynanın pilotsuz suüstü vasitələri və sahil müdafiəsi qanadlı raketləri ilə təhdid ediləcək. ABŞ-ın Ukraynaya 1,3 milyard dollarlıq yeni hərbi yardım paketi də bunu deməyə əsas verir. Bu paketə dörd NASAMS hava hücumundan müdafiə sistemi daxildir. Paketə NASAMS döyüş sursatları, “Phoenix Ghost” kamikadze dronları, “Switchblade” sursatları, minalardan təmizləmə və dron əleyhinə sistemlər daxildir.
ABŞ hərtbi yardımla yanaşı, Kiyevə Ukrayna taxılının dünya bazarlarına çatdırılmasında kömək də göstərəcək. Bu barədə Ağ evin mətbuat katibi Karine Jan-Pyer deyib: “Biz taxılın daha çox ehtiyac duyulan bazarlara çatdırmaq üçün Ukraynanın səylərini dəstəkləməyə davam edəcəyik. Kiyevə daha 1,3 milyard dollarlıq hərbi yardım paketinin ayrılması bunu asanlaşdırmaq üçün nəzərdə tutulub”.
Ağ evin sözçüsü əlavə edib: “Biz bacardığımız qədər kömək etmək üçün addımlar atırıq. Ukraynaya kənd təsərrüfatı sektorunu dəstəkləmək üçün daha 250 milyon dollar ayrılacaq”.
Bu arada Avropa İttifaqı ölkələrinin xarici işlər nazirlərinin görüşünə gələn Aİ-nin xarici siyasət idarəsinin rəhbəri Jozep Borrel deyib: “Qara dəniz təşəbbüsündən əlavə, Ukraynadan taxıl tədarükü üçün çay və quru marşrutları da mövcuddur. Bu, bizə böyük miqdarda taxıl ixrac etməyə imkan verir. Dəniz yolu bağlanarsa, həmin marşrutlarla idxalı artırmalıyıq. Bu məsələdə Ukraynanın qonşuları böyük səy göstərməli, sərhədləri açmalı və nəqliyyat daşımalarını asanlaşdırmalıdır”.
Xatırladaq ki, Rusiya Ukraynanın Odessada yerləşən taxıl limanlarını raket və pilotsuz uçuş aparatlarından atəşə tutur və bu da kənd təsərrüfatı infrastrukturunun dağılmasına, 60 min ton taxılın məhvinə səbəb olub. Bu hadisələr isə dünya bazarında taxılın bahalaşmasıua təsir edir.
P. ƏFƏNDİ, “Xalq qəzeti”