Stokholm polisi “Quran” nüsxəsinin yandırılması ilə bağlı aksiyaya icazə verib. Bundan narazı olan nümayişçilər Bağdaddakı İsveç səfirliyinə basqın edib. Bir qrup etirazçı Bağdadın xüsusi mühafizə olunan “yaşıl zona”sında krallığın diplomatik nümayəndəliyinin ərazisinə daxil olaraq qapını sındırmağa cəhd edib, diplomatik nümayəndəliyin binasını yandırıb. İsveç Xarici İşlər Nazirliyi bildirib ki, diplomatik missiyanın əməkdaşlarının həyatı üçün təhlükə yoxdur. İraq hakimiyyəti isə hadisəni pisləyib.
Səfirlik binasına yaxınlaşan etirazçılar şiə lideri Müqtəda əs-Sədrin təsviri olan bayraqlar və plakatlar qaldırıb. Polis nümayişçiləri dağıtmaq üçün su şırnaqlarından istifadə edib. Bu hadisədən sonra İsveçin Bağdaddakı səfirliyi fəaliyyətini dayandırıb.
P. ƏFƏNDİ, “Xalq qəzeti”