Avropada yaxın günlər həddindən artıq isti keçəcək. İtaliyada havanın temperaturu +50°C-yə çata bilər. Bu, rekord göstəricidir. Bundan əvvəl temperatur rekordu 2021-ci ildə qeydə alınıb - o zaman Siciliyada +48°C istilik olub. Bu dəfə isə Siciliya və Sardiniya adalarında temperaturun +47-48 °C dərəcəyə yüksələcəyi bildirilib.
İtaliya Səhiyyə Nazirliyi ölkədə müşahidə olunan anomal istilər səbəbindən “qırmızı” xəbərdarlıq elan edilən şəhərlərin sayını artırıb. İyulun 19-da 23 şəhər üçün “qırmızı” xəbərdarlıq elan olunub.
Şimali Afrikadan gələn yeni istilik dalğası bir neçə Avropa ölkəsində də göstəriciləri yeniləyə bilər. Hazırda Yunanıstan və İspaniyada anomal isti hava şəraitinin müşahidə edildiyi vurğulanır. İspaniyada bu həftə temperatur +44 °C qədər qalxacaq. İsveçrə və Avstriyada anomal isti havadan sonra fırtına və yağış gözlənilir. İngiltərədə anomal isti hava davam edəcək.
Türkiyədə isə yüksək temperatur bu gündən iyulun 24-dək Mərmərə və Egeydə müşahidə olunacaq. İstanbulda havanın temperaturunun +35°C, Manisa və Muğlada isə +43°C olacağı gözlənilir.
Agentliyin məlumatına görə, artıq Avropanın cənubunda yerləşən dövlətlərin hakimiyyət orqanları dəyişən hava şəraiti ilə əlaqədar insanları mümkün yanğınlar, nəqliyyat və enerji infrastrukturunda nasazlıqlar barədə xəbərdar etməyə başlayıb. Mütəxəssislər anomal istilərin təkcə yaşlılar, klinik cəhətdən həssas insanlar və uşaqlar deyil, bütün əhali üçün təhlükə yaratdığı barədə xəbərdarlıq ediblər. Əhaliyə saat 11:00-dan 18:00-dək zərurət olmadığı təqdirdə evdən çıxmamaq tövsiyə olunub. Onlara istidə daha çox su içmək və açıq rəngli nazik paltarlar geyinmək məsləhət görülüb.
Ə.PÜNHAN, “Xalq qəzeti”