“Meta” şirkətinin “Threads” proqramı ən sürətlə böyüyən tətbiq olsa da, fəal istifadəçi sayı gündən-günə azalır. İstifadəçilər “Threads”ə daha az vaxt sərf etməyə başlayıblar.
Milyonların “Twitter”ə alternativ axtardığı bir vaxtda ortaya çıxan və “İnstagram”la əlaqəsi olduğu üçün istifadəçiləri qısa müddətdə cəlb etməyi bacaran “Threads”də ilk vaxtlar günlük fəal istifadəçi sayı 49 milyon nəfər idi. Lakin “SimilarWeb” analiz şirkətinin hesabatına görə, “Threads”də bu rəqəm indi 23,6 milyon nəfərə düşüb. İstifadə müddəti isə 21 dəqiqədən 6 dəqiqəyə qədər azalıb.
Qrafiklər istifadəçilərin “Twitter”də daha çox vaxt keçirdiklərini göstərir. Həmçinin spam hücumları artıb. Bunun qarşısını almaq üçün isə şirkət görüntüləmə limiti kimi tədbirlərin görüləcəyini bildirib.
Əfsanə ƏHƏDLİ, “Xalq qəzeti”
