Bazar günü Fransa Prezidenti Emmanuel Makron Nazirlər Kabinetinin üzvləri ilə operativ qərargahın iclasını keçirib. Dövlət başçısı Fransa Daxili İşlər Nazirliyi və Ədliyyə Nazirliyinə ölkədə asayişi bərpa etməyi və baş verənlərin səbəblərini araşdırmağı tapşırıb. O, çərşənbə axşamı isə zərər çəkmiş kommunaların merləri ilə görüşəcək.

Bundan əvvəl, polis tərəfindən öldü­rülən yeniyetmənin nənəsi Nadia iğtişaşçı­ları dayandırmağa çağırıb və hər şeyi məhv etmək üçün nəvəsinin ölümünü bəhanə kimi istifadə etməyi pisləyib: “Mən yalnız nəvəmi öldürən polisi günahlandırıram. Nə yaxşı ki, polislər burdadır. Asayişi pozan insanlara deyirəm ki, dayanın. Onlar Naeli (qətlə yetirilən yeniyetmənin adı) bəhanə edirlər. Dayanmalıdırlar ki, pəncərələr sın­masın, məktəbləri dağıtmasınlar, analarla dolu olan avtobusları sındırmasınlar. Du­run, bu avtobusa minən analardır, küçədə gəzən analardır, hər şeyi sakitləşdirmək lazımdır. Biz onların qırılmasını istəmirik. Qoy bu gənclər sakit otursunlar”.

Yeniyetmənin nənəsi əlavə edib ki, o, Fransa ədalətinə inanır və iğtişaşçılar da öz əməllərinə görə cavab verəcəklər. Görünür, onun bu çağırışı eşidilib. Altıncı gecə 157 nəfər saxlanılıb. Bildirilib ki, bu rəqəm əv­vəlki günlərə nisbətən daha azdır.

Bu arada 17 yaşlı Naeli öldürən po­lisə kömək üçün pul yığılması ilə bağlı qalmaqal da genişlənir. Hüquq-mühafizə orqanının əməkdaşı çərşənbə axşamın­dan qətldə ittiham olunaraq istintaqa cəlb olunub. Fransa prezidentliyinə namizəd Erik Zemmuranın keçmiş mətbuat kati­bi təqsirləndirilən şəxsə və onun ailəsinə dəstək olmaq üçün pul yığmaq təşəbbüsü ilə çıxış edib. Bu məqsədlə 800 min avro­dan çox vəsait toplanıb. Əksəriyyəti solçu partiyalardan olan bir çox siyasətçilər onu pisləyərək “qalmaqallı” və “utanmaz” təşəbbüs adlandırıblar. Belə ki, Sosialist Partiyasının birinci katibi Olivye For pul yığımını dayandırmağı tələb edib.

Eyni zamanda, Paris polisinin prefek­ti Laurent Nunez bu mövzu ilə bağlı şərh verməyəcəyini söyləyib və polis birliyinin təşəbbüsə "anlayışla" yanaşdıqlarını qeyd edib. 

Xatırladaq ki, iyunun 27-də Fransa polisi 17 yaşlı Əlcəzair əsilli sürücünü öl­dürüb. Bundan sonra ölkədə iğtişaşlar baş­layıb. Əslində, bundan öncə də Fransada belə iğtişaşlar, qarşıdurmalar, irimiqyaslı etiraz aksiyaları, etirazçılarla güc struk­turları arasında toqquşmalar baş vermişdi. Demək olar ki, onların hər birində səbəb, təxminən, eyni olurdu – irqi ayrı-seçkilik, islamofobiya.

Ə. PÜNHAN, “Xalq qəzeti”