Tarixdə ilk dəfə olaraq süni zəka idman yarışlarını şərh edəcək. Bu barədə “bbc.com” saytı məlumat verib.
Aparıcı İT şirkəti “IBM”in hazırladığı süni intellekt “Wimbledon” tennis çempionatında matçın əsas anlarını şərh və təhlil edəcək. Süni zəka keçirilən yarışların maraqlı hissələrini seçərək turnirin saytında paylaşacaq. Həmçinin həmin videoları səsləndirəcək və sözləri altyazı şəklində ekranda da göstərəcək.
Şirkətin marketinq və kommunikasiyalar üzrə vitse-prezidenti Conatan Adaşek bu barədə deyib: “Hazırlanmış süni intellekt “Wimbledon– 2023” çempionatına yeni perspektiv gətirəcək. Bu texnologiya sayəsində böyük idman yarışlarını geniş auditoriyaya çatdırmaq mümkün olacaq.”
Qeyd edək ki, “Wimbledon” tennis çempionatı 2023-cü il iyulun 3-dən 16-dək keçiriləcək.
Əfsanə ƏHƏDLİ, “Xalq qəzeti”
