Fransa prezidenti Emmanuel Makron bir daha müstəqil Avropa müdafiə sisteminin yaradılmasına çağırıb. Parisdə keçirilən konfransda o deyib ki, Avropa İttifaqı öz hava məkanını qorumaq üçün strategiya hazırlamalıdır. Fransa liderinin fikrincə, bu yolla ABŞ-dan asılılığı azaltmaq olar: “Biz bilməliyik ki, təhlükə nədir... Bəs biz – avropalılar – nə istehsal etməyə qadirik? Bizə nə lazımdır. Lakin “rəflərdə olan hər şeyi dərhal almamalıyıq”.
Konfransda müzakirələr dron əleyhinə və raketdən müdafiə sistemlərindən gedib. İştirakçıların fikrincə, Rusiyanın Ukraynaya hərbi müdaxiləsi və döyüş əməliyyatlarının gedişi bu cür texnikanın etibarlığını, həm də qüvvələrin əlaqəli fəaliyyətinin nə qədər vacib olduğunu göstərdi.
Bundan başqa, müzakirələrdə nüvə təhlükəsinin qarşısının alınması da gündəmdə olub. Tədbirdə Almaniya, Böyük Britaniya, İsveç, Polşa, Slovakiya, Macarıstan, NATO və Avropa İttifaqının nümayəndələri iştirak ediblər.
Makron deyib ki, ABŞ-ın daha çox hərbi texnikanı standartlaşdırılması Avropanın bu ölkədən asılılığını artırıb: "Amerikalılar bizdən daha çox hərbi məhsulları standartlaşdırıblar, onların federal agentlikləri istehsalçılarına böyük subsidiyalar verir. Hazırda Fransa və İtaliya tərəfindən hazırlanmış “Mamba” zenit-raket kompleksi Ukraynada yerləşdirilib və fəaliyyət göstərir, əsas obyektləri və insanların həyatını qoruyur. Bu, Avropanı qoruyan, Avropanın özüdür”. Onun sözlərinə görə, “Mamba” sistemi artıq NATO-nun inteqrasiya edilmiş hava və raket hücumundan müdafiəsinin bir hissəsidir.
Qeyd edək ki, Fransa Almaniyanın Avropanın hava hücumundan müdafiə sistemini gücləndirmək planlarını açıq şəkildə tənqid edir. Keçən ilin sonlarında başlanan “European Sky Shield ” layihəsinə Fransa istisna olmaqla 17 Avropa ölkəsi, o cümlədən Böyük Britaniya daxildir. Fransa hökuməti hesab edir ki, o, Avropanın strateji suverenliyinin möhkəmlənməsini təmin etmir. Çünki ABŞ və İsrailin hərbi sənayesinə arxalanır.
Çox güman ki, NATO-nun hava və raketdən müdafiə sistemlərinə inteqrasiya olunmaq istəyən İsrailin “Arrow 3” sistemi və ABŞ-ın “Patriot”u da tezliklə “European Sky Shield” layihəsinə qoşulacaq.
Pünhan ƏFƏNDİYEV,
“Xalq qəzeti”