İran İslam Respublikası İnqilab Keşikçiləri Korpusunun (SEPAH) kəşfiyyat təşkilatının rəhbəri Məhəmməd Kazemi dünyanın 20 ölkəsini baş örtüyü ilə bağlı ölkəsində başlayan kütləvi etiraz aksiyalarını körükləndirməkdə suçlayıb. 

Briqada generalı Məhəmməd Kaze­minin açıqladığı siyahıda, hətta Tehranın münasibətləri normallaşdırmağa çalışdığı ölkələrin də adları var: “İslam İnqilabı Ke­şikçiləri Korpusunun kəşfiyyat xidmətinin apardığı araşdırmalar nəticəsində məlum olub ki, ölkədə təşkil olunan kütləvi iğti­şaşlarda 20-yə yaxın ölkə iştirak edib”. General bu sıyahıda ABŞ, Böyük Brita­niya, BƏƏ, Səudiyyə Ərəbistanı, Fransa, Almaniya, Kanada, Belçika, Avstriya, Al­baniya, Avstraliya, İslandiya, İtaliya, Ko­sovo, Norveç, Bəhreyn, Yeni Zelandiya və İsrailin adlarını çəkib. Maraqlıdır ki, kəşfiy­yatın rəhbəri bu zaman 18 ölkənin adını çəksə də, daha iki dövləti nişan verməyib. 

Kazeminin sözlərinə görə, İranın bu yaxınlarda diplomatik əlaqələri bərpa etdi­yi Səudiyyə Ərəbistanı, eləcə də BƏƏ də anti-İran kampaniyasında yaxından iştirak edirlər. Kəşfiyyat xidmətinin rəhbəri, həm­çinin iddia edib ki, İsrail və BƏƏ-nin xü­susi qurumlarının nümayəndələri İrandakı etirazlara necə və hansı formada dəstək veriləcəyini müzakirə etməkdən ötrü ərəb ölkələrindən birində vaxtaşırı görüşüblər. Bundan əlavə, general Səudiyyə Ərə­bistanı və Bəhreyni də İrana “düşmən ölkələr” adlandırıb. Kazemi xarici dövlətlə­rin ölkəsinə cəlb edilmiş kəşfiyyat orqan­larının daxili iğtişaşlarla bağlı məlumat və dəlillər toplamaq üçün əcnəbiləri, o cüm­lədən əfqan, pakistanlı və iraqlıları casus­luq fəaliyyətinə cəlb etdiyini vurğulayıb. O, məhz pozuculuq fəaliyyəti ilə bağlı qonşu ölkələrdən birinin və avropalıların 40-dan artıq vətəndaşının həbs edildiyini də icti­maiyyətin diqqətinə çatdırıb. 

Xatırladaq ki, 2022-ci il sentyabrın 17-də Tehranda əxlaq polisinin zorakılı­ğına məruz qalan gənc qızın ölümü İran ictimaiyyətinin səbir kasasını daşdırdı. Xalqın günahkarları cəzalandırmaq və an­tidemokratik qanunları aradan qaldırmaq tələbinin qarşısını hakimiyyət zorakılıqla yatırmağa qərar verdi. İranın bütün şəhər və qəsəbələrini bürümüş etiraz aksiya­larının 200-dən çox iştirakçısı indiyədək edam edilib, 500-dən artıq insan zindan­lara salınıb. Bundan başqa, 20 minə yaxın etirazçı həbsdə saxlanılır. 68-i yeniyetmə olmaqla 500-dən çox aksiyaçı etiraz təd­birlərində hərbi-polis qüvvələri tərəfindən qətlə yetirilib.

QEYD: Briqada generalı Məhəmməd Kazemi İran İslam İnqilabı Keşikçiləri Korpusunun (SEPAH) kəşfiyyat təşkilatı­nın rəhbəri vəzifəsinə təyin edilənə qədər uzun illər kəşfiyyat sektorunda çalışıb, milli təhlükəsizlik məsələlərində böyük təcrübəyə malikdir. Xatırladaq ki, ötən il mayın 22-də İran İslam İnqilabı Keşik­çiləri Korpusunun nümayəndəsi polkovnik Sayad Xodai Tehranda öldürülüb. Daha sonra İsrail yüksək rütbəli iranlı zabitin öldürülməsi ilə bağlı ABŞ-ı xəbərdar edib. SEPAH Xodainin qətlini terror aktı kimi qiymətləndirib.

İ.HƏSƏNQALA, “Xalq qəzeti”