ABŞ Prezidentinin silahlara nəzarət üzrə keçmiş nümayəndəsi Marşal Billinqsley bildirib ki, Çin dünya bazarında ABŞ dollarının mövqeyinə ciddi təhlükə yaradır.
M.Billinqsleyin fikrincə, Pekin Rusiyaya qarşı tətbiq edilən sanksiyalardan dərs alıb və buna görə də ölkənin iqtisadi təhlükəsizliyini gücləndirməyə başlayıb. Məsələn, Çin qızıl ehtiyatlarını artırıb və ABŞ dövlət istiqrazlarına investisiyanı azaldıb. Siyasətçi hesab edir ki, Çin Rusiya və Braziliya ilə birlikdə dolları “əvəz etməyə" çalışır.
“Nəhayət, onlar bunu ABŞ-ı azad dünyanın lideri mövqeyindən uzaqlaşdırmağın bir yolu kimi görürlər. Qısa müddətdə onlar bunu maliyyədən milli təhlükəsizliyimizi təmin etmək üçün alət kimi istifadə etmək qabiliyyətimizi sarsıtmaq kimi görürlər”, – deyə siyasətçi bildirib.
M.Billinqsley iddia edir ki, Çin də bank sektorunun aktivlərini artıraraq maliyyə sistemini sanksiyalara davamlı edir. Bundan əlavə, Çin ciddi məhdudiyyətlər tətbiq etməklə, ABŞ iqtisadiyyatına “cavab zərbəsi vura” bilər.
“Xalq qəzeti”