Avropa İttifaqının (Aİ) maliyyə dəstəyi ilə Ümumdünya Səhiyyə Təşkilatının (ÜST) Azərbaycandakı ölkə ofisi tərəfindən həyata keçirilən “Psixi sağlamlıq xidmətlərinin münaqişədən sonrakı dövrdə koordinasiyası və transformasiyası” layihəsinin nəticələri təqdim olunub. Bu barədə məlumat verən təşkilatın Azərbaycan ofisindən bildiriblər ki, təqdimatın əsas məqsədi layihə çərçivəsində görülən işləri və əldə olunan nailiyyətləri, ÜST-nin multidisiplinar psixososial dəstək təcrübəsini yerli tərəfdaşlarla bölüşməkdir.
Tədbirdə Psixi Sağlamlıq Mərkəzinin direktoru Fuad İsmayılov Azərbaycanda psixi sağlamlıq sisteminin mövcud vəziyyəti, ÜST-nin psixi sağlamlıq və psixososial dəstək üzrə əlaqələndiricisi Elturan İsmayılov layihənin aralıq nəticələri, Azərbaycan Tibb Universitetinin professoru Ağahəsən Rəsulov multidisiplinar psixososial dəstək mövzularında məruzələr ediblər.
ÜST-nin Azərbaycandakı nümayəndəsi Hande Harmancı bildirib ki, “Psixi sağlamlıq xidmətlərinin münaqişədən sonrakı dövrdə koordinasiyası və transformasiyası” layihəsinin təməl hədəfləri əhali arasında mental vəziyyəti yaxşılaşdırmaq və ilkin səhiyyə xidməti müəssisələrində psixoloji dəstəyə əlçatanlığı artırmaqdır. Onun sözlərinə görə, Qarabağ müharibəsindən sonra bu məsələnin önəmi daha da artıb. Layihə çərçivəsində ilk olaraq Ağcabədi, Bərdə, Tərtər, Ağdam, Füzuli rayonları seçilib. Bu rayonlarda ilkin səhiyyə qurumlarında tibb işçilərinin psixoloji-sosial istiqamətdə təməl bilik və bacarıqlarının artırılması üçün təlimlər keçirilib.
H.Harmancı qeyd edib ki, layihə çərçivəsində 20 psixiatr və ilkin səhiyyə həkimindən ibarət milli təlimçi komandası yaradılıb. Milli təlimçilər üçün beynəlxalq ekspert tərəfindən superviziyalar təşkil olunub. Rayonlarda 100-dən çox ilkin səhiyyə həkiminin psixi sağlamlıqla bağlı bilik və bacarıqları artırılıb. Təlimlərdə iştirak etmiş ilkin səhiyyə həkimlərinə milli təlimçilər tərəfindən 10 superviziya keçirilib. Həmçinin Ağdam rayonlararası ruhi-əsəb dispanserindǝ psixoloq və sosial işçi üçün ofis quraşdırılıb. TƏBİB-in həssas əhali qrupları ilə iş üzrə 50-yǝ yaxın koordinatoru üçün “Psixososial dəstəyin təməl prinsipləri” mövzusunda təlim təşkil olunub.
Təqdimat toplantısında, həmçinin Milli Məclisin Səhiyyə komitəsinin sədri, akademik Əhliman Əmiraslanov, Əmək və sosial siyasət komitəsinin sədri Musa Quliyev, TƏBİB-in icraçı direktorunun müavini Anar İsrafilov və Dövlət Tibbi-Sosial Ekspertiza və Reabilitasiya Agentliyi İdarə Heyətinin sədri Anar Bayramov çıxış edib layihə barədə fikirlərini bölüşüblər.
Tədbir zamanı koordinasiya mexanizmlərini təkmilləşdirmək və həyata keçirmək üçün koordinasiya qrupunun ilk görüşü təşkil olunub. Həmçinin ÜST və dövlət qurumlarının nümayəndələri səmərəliliyi artırmaq üçün Psixi sağlamlıq və psixososial dəstəyin (PSPSD) yönləndirmə sistemlərinin təhlilindən əlavə növbəti addımları da müəyyən edib.
ÜST-nin mütəxəssisləri rayon mərkəzi xəstəxanalarında əhaliyə birbaşa psixososial dəstək göstərirlər. Bununla yanaşı, əhalinin maarifləndirilməsi, psixoloji sağlamlıqla bağlı stiqmanın aradan götürülməsi və xidmətlər haqqında məlumatlandırma ilə bağlı Bərdə və Ağcabədidə kampaniyalar həyata keçirilib.
Pilot layihənin bu ilin sonuna qədər həyata keçirilməsi planlaşdırılır.
Zərifə BƏŞİRQIZI, “Xalq qəzeti”