“Microsoft” şirkətinin təsisçisi Bill Qeyts gələcəkdə süni intellektin istifadəsi ilə bağlı esse dərc edib. Onun fikrincə, süni intellektin inkişafı mikroprosessorun, fərdi kompüterin, internetin və mobil telefonun yaradılması qədər vacibdir.
Qeyts etiraf edir ki, süni intellekt yaratmağın riskləri böyükdür. Belə ki, bir tərəfdən, insanlar ondan sui-istifadə etməyə başlaya bilərlər, digər tərəfdən isə, belə texnologiya təkmilləşdikcə “öz məqsədini özü təyin edə biləcək” güclü süni intellektin meydana çıxması mümkündür. “Bununla belə, süni intellekt təkcə əmək məhsuldarlığının artırılması vasitəsi kimi istifadə oluna bilməz: o, müxtəlif sahələrdə: iş yerində, səhiyyədə və təhsildə qlobal bərabərsizlikləri aradan qaldırmağa kömək edə bilər”.
Süni intellekt səhiyyədə tibb mütəxəssislərini hesabat vermək, sığorta anketlərini doldurmaq və s. kimi uzun vaxt aparan sənəd işlərindən azad edəcək. Bu, həkim kadrlarının çatışmazlığı ilə üzləşən yoxsul ölkələr üçün xüsusilə vacibdir: bəzi funksiyaların süni intellektə həvalə edilməsi mütəxəssislərə xəstələrlə birbaşa ünsiyyətə daha çox vaxt ayırmağa imkan verəcək. Süni intellekt tibb müəssisələrindən uzaqda yaşayan xəstələrin müalicəsində də xidmət göstərə bilər. Yeni texnologiya artıq tibbdə məlumatların təhlili və dərmanların hazırlanması üçün istifadə olunur. Növbəti mərhələdə süni intellekt dərmanların yan təsirlərini proqnozlaşdırmaq və doza səviyyələrini hesablamaqla məşğul olacaq.
Süni intellekt həmçinin kənd təsərrüfatında istifadə oluna bilər ki, bu da yerli iqlimə uyğun məhsulların və heyvandarlıq üçün vaksinlərin inkişafına kömək edir. Qlobal istiləşmə həyat səviyyəsindəki qeyri-bərabərliyi artırdığı üçün problem aktualdır: “Fərqli hava və iqlim dəyişikliyi aşağı gəlirli ölkələrdə yaşayan fermerlərə daha çox təzyiq göstərir” – deyə Qeyts bildirib.
Qeytsin fikrincə, yaxın 5-10 ildə süni intellekt nəinki sadaladığımız sahələrə təsir göstərəcək, eyni zamanda, tələbələr və müəllimlər də yeni texnologiyalara yiyələnməli olacaqlar.
Səadət RZAYEVA, “Xalq qəzeti”
