Azərbaycan–İsrail əlaqələri xalqlarımız arasında tarixən mövcud olmuş sıx dostluq və qarşılıqlı hörmət ənənələrinə əsaslanır. Məmnunluqla qeyd etmək istəyirəm ki, ötən 30 ildə siyasi, iqtisadi, hərbi-texniki, səhiyyə, mədəni və qarşılıqlı maraq doğuran digər sahələrdə əməkdaşlığımız yüksələn xətt üzrə inkişaf edib, dostluq əlaqələrimiz daha da möhkəmlənib. Azərbaycanda əsrlərdən bəri mehribanlıq, əmin-amanlıq və harmoniya şəraitində yaşayan yəhudi icması, həm İsraildə, həm də dünyanın digər ölkələrində məskunlaşmış yəhudi əsilli həmvətənlərimiz dövlətlərarası münasibətlərimizin möhkəmlənməsinə öz töhfələrini verməkdədirlər.
Prezident İlham Əliyevin Azərbaycanla İsrail Dövləti arasında diplomatik münasibətlərin qurulmasının 30 illiyi münasibətilə İsrail Prezidenti İshak Hersoqa təbrik məktubundan
Bakı, 8 aprel 2022-ci il
Söhbət Azərbaycanın mühüm dostu və sədaqətli tərəfdaşı olan bir dövlətlə münasibətlərin yüksək səviyyəsindən gedir. Belə bir yazının əvvəlində iki həmkarımızın bu məsələ ilə bağlı söylədiyi arqumentlərin xatırladılmasını kimsə məqsədəuyğun saymaya bilər. Ancaq söhbət uzun illər ölkəmizdə yaşamış yəhudilərin Bakıya, Azərbaycana bağlılığından getdiyinə görə mən həmuin arqumentlərin məhz girişdə verilməsini istədim.
Birinci arqument. Qubadakı Qırmızı qəsəbədə doğulub böyümüş, uzun illər Bakının Keşlə qəsəbəsində – bizim həmkarımızla qonşuluqda yaşamış, müstəqilliyin ilk illərində ölkəmizdə yaranmış xaos və anarxiyadan ehtiyatlanaraq ABŞ-a köçmüş Niftalı (Mişa) Niftalıyev adlı yəhudi ömrünün son anlarında əzizlərinə deyibmiş ki, məni Nyu-Yorkda yox, Bakıda dəfn edərsiniz: “Qoy Bakıdan ayrı yaşadığım illərin ağrı-acısından xilas olum”.
İkinci arqument. Həmkarlarımızdan biri danışır ki, İsrailin Hayfa şəhərindəki Bakı küçəsinin əsas sakinləri Azərbaycandan köçmüş yəhudilərdir. Onlar öz evlərində və iş yerlərində yəhudi dilində danışsalar da, Bakı küçəsində görüşərkən Azərbaycan dilində danışırlar.
Fikrimizcə, bu iki fakt təkcə həmin dost xalqın təmsilçilərinin bizə, Vətənimizə olan sədaqətinin göstəricisi deyil. Bu faktlar, eləcə də, azərbaycanlıların ölkədə yaşayan digər xalqlara münasibətinin də güzgüsüdür. Çox təəssüf ki, həmişə belə olmur. Biz yaxın qonşularımız olan fars şovinistlərinə də, hay sürüsünə də həmişə hörmət və ehtiramla yanaşmışıq. Təəssüf ki, qarşılığında heç də anoloq olmayan münasibətlər görmüşük.
... Bəli, Azərbaycanın Xarici işlər naziri Ceyhun Bayramov və parlamentarilərimiz martın son günlərində İsraildə səfərdə oldular. Rəsmi məlumatlarda qeyd edildiyi kimi, həmin ölkədə Azərbaycanın səfirliyinin açılışı oldu. Yeri gəlmişkən, Azərbaycanın İsraildə səfirliyinin açılması məsələsi gündəliyə gələndə bütün həmkarlarım kimi mən də elə bilirdim ki, bu tarixi fakta Bakı və Tel - Əvivdən gələn münasibətlərlə tanış olacağıq. Ancaq bu iki paytaxtdan əvvəl Tehran və İrəvandan gələn münasibətlərə şahidlik etməli olduq. Tehran rəsmiləri bu faktdan necə həyəcanlandılarsa bilmirəm, amma fakta münasibətlərində açıq şəkildə çaşqınlıq görünürdü: “Azərbaycan İranın düşmənini qulağımızın dibinə gətirir”. Bu, nə deməkdir, biz İsraildə səfirlik açırıq, İranla sərhəddə yox. İrəvandan gələn münasibət isə daha absurd idi: “Əliyev hökuməti Ermənistanın digər ərazilərini də ələ keçirmək üçün İsrail silahlarına sahib çıxır.” Məntiqsizlikdir, deyilmi?! Məgər Tel-Əvivdə səfirliyimiz olmayanda İsraildən silah ala bilmirdik?
Məsələyə Tel-Əvivdən gələn münasibətə də nəzər salaq. İsrailin Xarici İşlər Nazirliyinin ötən il noyabrın 18-də yaydığı məlumatda Azərbaycan rəhbərliyinin həmin addımı “tarixi qərar” adlandırılırdı: “Bu gün Azərbaycan parlamenti Azərbaycanın İsraildə, Təl-Əvivdə səfirliyinin açılması ilə bağlı tarixi qərar qəbul edib. Bu, əhalisinin əksəriyyətinin şiə olduğu müsəlman ölkəsinin İsraildə ilk səfirliyi olacaq.”
Məsələyə Bakının münasibətinə gəlincə isə dövlət başçımızın ötən il dekabrın 22-də Benyamin Netanyahuya İsral Dövlətinin Baş naziri kimi fəaliyyətə başlaması münasibətilə göndərdiyi təbrikə nəzər salmaq kifayətdir: “Ümidvaram ki, səfirliyimizin açılması Azərbaycan – İsrail münasibətlərinin inkişafına töhfə verəcəkdir. Əminəm ki, dost xalqlarımızın mənafelərinə uyğun olaraq, ölkələrimiz arasında əlaqələrin dərinləşdirilməsi, qarşılıqlı faydalı əməkdaşlığımızın daha da genişləndirilməsi istiqamətində birgə səylərimizi bundan sonra da uğurla davam etdirəcəyik”.
Bu günlərdə isə Azərbaycan Xarici İşlər Nazirliyinin yaydığı məlumatda bildirilirdi ki, Ceyhun Bayramovun tarixi səfərindən sonra İsraillə əməkdaşlığımız daha da genişlənəcək. Əlavə edilirdi ki, martın 29-da İsraildə Azərbaycanın səfirliyi açılacaq. Bu məqsədlə Azərbaycanın Xarici işlər naziri Ceyhun Bayramov və Milli Məclisin bir qrup deputatı İsraildə səfərdədir. Yeri gəlmişkən, Prezident İlham Əliyevin bu il yanvarın 11-də imzaladığı sərəncamla Muxtar Məmmədov Azərbaycanın İsraildəki fövqəladə və səlahiyyətli səfiri təyin edilib. Səfir ötən bazar günü etimadnaməsini İsrail Prezidenti İshak Hersoqa təqdim edib.
Ölkələrarası münasibətlərin son otuz illik səhifələrinə nəzər salarkən görürük ki, İsrail Dövləti 1992-ci il aprelin 7-də Azərbaycanın müstəqilliyini tanıyıb. Bu illər ərzində Azərbaycan və İsrail dövlətlərinin siyasi, iqtisadi, mədəni və hərbi sahələrdə sıx əlaqələri yaranıb. 1993-cü ildə İsrailin Azərbaycanda səfirliyi açılıb. Ekspertlər əmindirlər ki, “Likud” Partiyasının lideri Benyamin Netanyahunun yenidən İsrailin Baş naziri seçilməsi ölkələrimiz arasında əlaqələrin daha da yüksəlməsinə təkan verəcək.
Azərbaycan Prezidenti İlham Əliyevin ötən il dekabrın 29-da Benyamin Netanyahunu İsral Dövlətinin Baş naziri kimi fəaliyyətə başlaması münasibətilə təbrikində deyilir ki, ötən otuzillik dövr ərzində qarşılıqlı etimad və dəstək kimi möhkəm təməllər üzərində qurulmuş dövlətlərarası əlaqələrimizin yüksələn xətt üzrə inkişaf edərək hazırkı səviyyəyə çatması məmnunluq doğurur.
Bəli, bu gün Azərbaycan və İsrail arasında dostluq və əməkdaşlıq strateji əhəmiyyət kəsb edir. 44 günlük Vətən müharibəsində İsrail Azərbaycanın ədalətli mövqeyini dəstəklədi. Ölkələrimiz arasında hərbi sahədə də yaxşı əlaqələr var. İnanırıq ki, iki dövlətin dostluq və əməkdaşlığı bundan sonra daha da dərinləşəcək və güclənəcək.
Sonda başqa bir faktı da yada salaq. Belə ki, bir neçə il əvvəl ABŞ-ın nüfuzlu “News Blaze” nəşrində jurnalist və publisist Nurit Qrinqerin “Azərbaycan –İsrail: unikal tərəfdaşlıq və dostluq” başlıqlı məqaləsi dərc edilmişdi. Müəllif İsrail rəsmilərinin Bakıya, Azərbaycan rəsmilərinin isə Tel-Əvivə səfərlərindən bəhs edir, eləcə də İsraillə Azərbaycan arasında olan iqtisadi, hərbi, mədəni və turizm əməkdaşlığından bəhs edirdi. Məqalədə qeyd edilirdi ki, Azərbaycan Prezidenti İlham Əliyevin rəhbərliyi altında ölkəmizin İsrail ilə dostluğu müxtəlif sahələrdə genişlənib. Keçmiş münaqişəyə toxunan müəllif xatırladırdı ki, İsrail Bakının haqlı mövqeyini dəstəkləyir və Azərbaycanla hərbi sahədə əməkdaşlıq edir.
Azərbaycan – İsrail dostluq və əməkdaşlığının yeni səhifələri, münasibətlərdəki son faktlar barədə olan bu sətirləri üç il əvvəl ABŞ mətbuatında verilmiş yazının arqumentləri ilə tamamlamağımız təsadüfi deyi. Belə ki, cənab Nurit Qrinqerin məqaləsində yazılır: “ Bu dostluq münasibətlərinə təsir göstərən faktlardan biri də yəhudilərin Azərbaycanda 2000 ildən artıq müddətə yaşaması və burada indiyədək antisemitizm və ayrı-seçkiliyin olmamasıdır”. İsrail rəsmilərindən birinin çıxışında isə bildirilirdi ki, yəhudilər Azərbaycanda 2500 ildən çoxdur ki, heç bir problemsiz, qarşıdurmasız, dost və qardaşcasına yaşayırlar.
Təbii ki, yəhudilərin burada iyirmi, ya da iyirmi beş əsr yaşadığını sübut etməyə İsrailin də ehtiyacı yoxdur, bizim də. Ancaq görünür Tehranın buna ehtiyacı var. Fars şovinistləri “İsraili qulağımızın dibinə gətirməyin” – deyirlərsə, deməli, yəhudilərin bu ərazidə min illərdən bəri yaşadıqlarını ya bilmir, ya da bilərəkdən danmaq istəyirlər. Nə istəyirlər, istəsinlər. Azərbaycan istənilən dövlətlə əməkdaşlıqda müstəqildir və tərəfdaşlarını özü seçir. İran və Ermənistan da sivil qonşuluq münasibətləri çərçivəsində münasibət qurmağı öyrənsələr, onlarla da dostluq edə bilərik. Təəssüf ki, bu qonşularımız hələ özlərinin sivil dövlətini qura bilmirlər.
İttifaq MİRZƏBƏYLİ, “Xalq qəzeti”