Müasir dövrümüzdə bütün sahələrdə olduğu kimi, səhiyyədə də gündən-günə inkişaf edən, əhalinin ehtiyaclarını asanlaşdıran yeni xidmətlər yaradılıb. Avtomatlaşdırılmış elektron xidmətlərin tibb sahəsində də tətbiqi Azərbaycanın əsas prioritetlərindəndir.
Yeni klinika bu xidmətlərin yetərincə tətbiq edildiyi tibb ocaqlarımızdandır. Azərbaycan Respublikasının Prezidenti İlham Əliyev və birinci xanım Mehriban Əliyevanın iştirakı ilə açılan Yeni klinika 2020-ci il martın 28-dən fəaliyyət göstərir. Dövlət başçısının tibb müəssisəsinin açılışında bildirdiyi kimi, bu xəstəxana Azərbaycanda təchizat, avadanlıq və göstəriləcək xidmət baxımından aparıcı xəstəxanadır.
Qeyd etməliyik ki, müalicə-müayinə işini yüksək səviyyədə və dəqiqliklə yerinə yetirməyə imkan verən avadanlıqlarla təchiz olunan tibb müəssisəsinin kollektivi həm koronavirus pandemiyası, həm də Vətən müharibəsi dövründə böyük əzmkarlıq göstərmişdir.
Müsahibimiz Yeni klinikanın baş həkimi Cavid Paşayevdir. Xatırladaq ki, C.Paşayev 2022-ci il iyulun 15-dən klinikaya rəhbərıik edir.
– Doktor, artıq 10 aydır ki, belə böyük səhiyyə müəssisəsinə rəhbərlik edirsiniz. Sizə çətin deyil ki?
– İş görülən yerdə çətinliyin olması təbiidir. Çalışıb onu aradan qaldırmaq rəhbərliyin əsas vəzifəsidir. Bildirmək istəyirəm ki, tibb müəssisəsində kifayət qədər gənc mütəxəssis işləyir. Müxtəlif xarici ölkələrdə tibbi təhsil alıb təcrübə keçən, bacarıqlı peşəkarlara həmişə, hər yerdə ehtiyac duyulur. Biz də ulu öndər Heydər Əliyev tərəfindən əsası qoyulan uğurlu gənclər siyasətini rəhbər tutub, belə gənclərlə görüşlər keçirir, onların fəaliyyətilə yaxından maraqlanır, təkliflərini dinləyirik. Mərkəzimizdə gənc kadrlarla yanaşı, şəhid ailəsi üzvlərinin, qazilərin və Vətən müharibəsi iştirakçılarının da işlə təmin olunduqlarını bildirmək istəyirəm. Şəhid ailələrinin üzvlərinə, qazilərə, Qarabağ müharibəsi iştirakçılarına hörmət, ehtiram, diqqət və qayğı göstərməyi özümüzə borc bilir, imkan daxilində onların işlə təminatına, eyni zamanda müalicəsinə kömək etməyə çalışırıq.
– Üçüncü ildir ki, ölkəmizdə İcbari Tibbi Sığorta (İTS) tətbiq edilir. Klinikada indiyədək nə qədər vətəndaş İTS-in xidmətlər zərfindən yararlanıb?
– Klinika İcbari Tibbi Sığorta sisteminin tətbiq olunduğu tibb müəssisələrinin siyahısına 2022-ci il iyunun 6-dan daxil olub. O gündən klinikaya müraciət edənlərin sayı günbəgün artır. Son üç ay ərzində icbari tibbi sığortanın xidmətlər zərfi çərçivəsində 32 min 503 nəfər ambulator mərkəzə müraciət edib. Tibb müəssisəsinə icbari tibbi sığorta üzrə stasionar tibbi xidmət üçün müraciət edən 952 nəfərə lazımı müayinə və müalicə xidməti göstərilib. Müxtəlif xəstəliklərlə bağlı isə pasiyentlərdən 994 nəfər üzərində cərrahi əməliyyat tətbiq edilib. Əlavə edim ki, ilin birinci rübündə mərkəzə müraciət edən vətəndaşlara, ümumilikdə, 158 min 54 ambulator tibbi xidmət göstərilib.
– Mərkəzdə hansı mürəkkəb əməliyyatlar icra olunur?
– Günü-gündən inkişaf edən Yeni klinikada İTS çərçivəsində hər cür əməliyyatlar uğurla icra olunmaqdadır. Mərkəzdə ilk dəfə olaraq icbari tibbi sığorta ilə “laparoskopik düz bağırsağın ön rezeksiyası”, cərrahiyyənin üst səviyyə əməliyyatlarından hesab olunan laparoskopik yolla “Heller miyotomiya + Dor Fundoplikasiya” (nadir rast gəlinən udma çətinliyi), böyük bir cərrahi komanda ilə torakolaparoskopik üsulla “İvor-Lewis” proseduru, “Radikal sistektomiya” (sidik kisəsinin çıxarılması) əməliyyatı, “Laparoskopik çox aşağı ön rezeksiya + koloanal anastomoz + loop ileostomiya açılması” əməliyyatı, ikitərəfli nefroureterektomiya (hər iki böyrəyin sidik axarlarının böyük hissəsi ilə bərabər çıxarılması) əməliyyatı və xidmətlər zərfi daxilində ilk dəfə olaraq koronar angioqrafiya proseduru icra olunub. Bu əməliyyatların aparılması kollektivdə necə bacarıqlı, peşəkar, işinin öhdəsindən yüksək səviyyədə gələn həkimlərin olmasının göstəricisidir.
– Xəstəxanada tibbi personalın bilik və bacarıqlarının artırılması istiqamətində hansı işlər görülür?
– 2022-ci ilin sentyabr ayından etibarən klinikada fəaliyyət göstərən tibbi personala və qeyri-tibbi əməkdaşlara ünsiyyət bacarıqları, xidmət mədəniyyəti, etik davranış qaydalarına dair təlimlər keçirilir. Eyni zamanda xəstəxanada ayda iki dəfə tibbi seminarlar təşkil olunur. Artıq bu ay beşinci tibbi seminarın keçirildiyini qeyd etmək istəyirəm. Klinika rəhbərliyi və əməkdaşlarının iştirakı ilə baş tutan tibbi seminarlarda müxtəlif mövzular araşdırılaraq müzakirəyə çıxarılır. İş prosesində səsləndirilən təkliflərə uyğun addımlar atılır.
– Klinikada kollektivin işi yalnız xəstələrə xidmətləmi bitir?
– Xeyr, başlıca vəzifəmiz vətəndaşların sağlamlığı keşiyində durmaq olsa da, ötən ilin sentyabr ayından klinikada bir sıra sosial layihələr də həyata keçirmişik. İlk tədbirimiz Yeni Azərbaycan Partiyasının yaranmasının 30 illiyinə həsr olunub. Sonra Qarabağ müharibəsinin şəhidlərini anmaq, torpaqlarımızın işğaldan azad edilməsi və Zəfər Günü ilə bağlı “Zəfərin fatehləri” adlı tədbiri keçirmişik. Ümummilli lider Heydər Əliyevin vəfatının 19-cu ildönümü ilə bağlı anım mərasimi, bugünlərdə isə TƏBİB-in icraçı direktoru Vüqar Qurbanovun iştirakı ilə “Heydər Əliyev ili”nə həsr olunmuş tədbirdə ulu öndərin büstünün təntənəli açılış mərasimi təşkil edilib.
Klinikada fəaliyyət göstərən tibb və qeyri-tibb personalın pandemiya və Vətən müharibəsi dövründə vəzifə öhdəliklərini layiqincə yerinə yetirdiklərinə və əmək funksiyalarının icrasında fərqləndiklərinə görə bir sıra əməkdaşların təltif edilməsi mərasimi təşkil olunub. Yeni klinikanın təşkilatçılığı ilə “Serebral iflic və cəmiyyət” mövzusunda forum keçirilib.
Klinikanın əməkdaşları arasında daxili kommunikasiyanın inkişaf etdirilməsi üçün başqa maraqlı layihələr də təşkil olunub. Belə ki, klinikanın həvəskar futbolçu əməkdaşları arasında təşkil olunan ilk mini futbol turnirinə start verilib.
Qeyd edək ki, Yeni klinika tibb müəssisəsi Qafqazın ən böyük xəstəxanalarından biri hesab olunur. 300-ə yaxın həkim və tibbi heyətin çalışdığı bu tibb ocağında hazırda ümumi cərrahiyyə, terapiya, təcili və təxirəsalınmaz tibbi yardım, reanimasiya şöbələri və poliklinika fəaliyyət göstərir. Poliklinikada, həmçinin urologiya, kardiologiya, ümumi cərrahiyyə, ürək-damar cərrahiyyəsi, neyrocərrahiyyə, LOR, qastroenterologiya, radiologiya, revmatologiya, endokrinologiya, ginekologiya, nevrologiya və pediatriya şöbələri poliklinik olaraq vətəndaşların xidmətindədir.
Söhbəti yazdı:
Zərifə BƏŞİRQIZI, “Xalq qəzeti”