Ankarada Azərbaycan səfirliyinin nəzdində fəaliyyət göstərən Azərbaycan Mədəniyyət Mərkəzinin xətti ilə ümummilli lider Heydər Əliyevin əziz xatirəsinə həsr olunmuş kitab buraxılıb.
İbrətamiz məhəbbət dastanı olan bu əsər “Duman çəkiləndə” adlanır və Böyük Qarabağ Zəfərini vəsf etmək məqsədilə qələmə alınıb. Müəllifi yazıçı-publisist Sabir Şahtaxtıdır. Siyasi-tarixi janrda yazılmış roman Müzəffər Ali Baş Komandan İlham Əliyevin rəhbərliyi ilə qəhrəman Azərbaycan Ordusunun apardığı 44 günlük rəşadətli Vətən müharibəsinin tam təfsilatını əhatə edir. Əsərdə beynəlxalq hüququn pozulması ilə Azərbaycana göstərilən siyasi təzyiqlər, süni Qarabağ münaqişəsinin yaradılmasının məqsəd və nəticələri, xalqımızın tükənməz yurd sevgisi, dövlət–xalq vəhdətinin tükənməz gücü, şəhid cənazələrinin, qazilərin qarşılanmasındakı ən duyğusal məqamlar, qanlı cəbhə olayları və s. obrazlı şəkildə oxucuya çatdırılır.
Kitaba akademik Nizami Cəfərov “Ön söz” yazıb. 12 fəsil və 44 bölmədən ibarət olan əsərin “Zəfər Əzizi” adlı hissəsi özündə böyük bir səmavi fəlsəfi anlayışı tərənnüm etdirir. Romanda Türkiyənin dövlət və millət olaraq qazanılan qələbəyə mənəvi dəstəyi də böyük sevgilərlə qələmə alınıb.
...Müharibənin ilk günündə 13 nəfərlik taqımın könüllü əsgərləri özlərinə ləqəb götürürlər: Şəhid, Qorxmaz, Tufan, Cənnət, Təmkin, Mübariz, Polad, Cəsur, İldırım, Qartal, Cihad və Qurd. Bu igidlərin hər biri Vətən fədaisidir. Onların hərəsi bir tanınmış məkanda qəhrəmanlıqla şəhid olur. Təkcə dəstənin komandiri Tarix sağ qalır. İdeya və siyasi məziyyətinə görə əsər milli-mənəvi dəyərlərimizi tam şəkildə ehtiva edir. Burada insan, torpaq və vətən anlayışı qabardılmaqla bərabər, humanizm prinsipləri qorunmuşdur. Romanda manqanın tərkibinin “12+1” sayda göstərilməsi rəmzi xarakter daşıyır. Azərbaycan Konstitusiyası 12 fəsildir. 12 ay, 12 imam, 12 mələk, tək amal və s. Zaman baxımından hər şey kimi, insan ömrü də axaraq sonda torpağa qovuşur. Lakin tarix nəsillərin yaddaşında keçmişə və gələcəyə işıq saçır, milli vətənpərvərlik məfkurəsini nəsildən-nəslə ötürür.
Tarixin Bakı Metropoliteninin “20 Yanvar” stansiyasında qatara minib “Azadlıq” stansiyasından çıxaraq cəbhəyə yola düşməsi keçmiş Qarabağ münaqişəsinin tarixini nəsillərə daşıyan real həyat hekayələri kimi romanda əksini tapıb.
XQ
