Builki 11-ci marşrut “Tbilisi–Bakı” oldu
Müxtəlif ölkələr arasında məsafələri əhatə etməklə velosiped yürüşləri təşkil edən “Ride 25” şirkətinin builki 11-ci yürüşü bu günlərdə Azərbaycan və Gürcüstan ərazilərindən keçərək başa çatıb.
Ümumi məsafəsi 563 kilometr təşkil edən veloyürüş Tbilisi–Telavi–Qax–Qəbələ–Bakı marşrutu ilə iştirakçılara Qafqazın qədim yaşayış məskənlərini və tarixi yerlərini kəşf etmək, Azərbaycanın zəngin mədəni irsi ilə yaxından tanış olmaq imkanı yaradıb. Bu barədə veloyürüşün təşkilatçı, həm də iştirakçılarından biri, İngiltərədə yaşayan fəal soydaşımız Kamran Əzizinin fikirlərini öyrəndik. O qeyd etdi ki, yürüşün məqsədi Londondan başlayıb, 25 il ərzində Sidneydə bitirməkdir.
– Hər il 100-dən çox velosipedçi ilə 700–800 kilometr yürüş edirik. Əsas məqsəd Afrikada aclıqdan əziyyət çəkən uşaqlara maddi dəstək göstərməkdir. İndi orada yetim uşaqlar üçün bir yataqxana açılmışdır və oranın təminatında onlara yardım edirik. Veloyürüş sayəsində Uqandada açılan yetimlər evində 180 uşağın qida və digər tələbləri ödənilir.
Bildiyimiz kimi, quru sərhədlər bağlı olduğundan bu veloyürüşümüzdə müəyyən çətinliklər yaratmışdı. Veloyürüşü davam etdirmək istəyən təşkilatçılar məcbur olaraq, Ermənistandan keçməli idilər. Lakin biz istədik ki, bu cür nəcib məqsədli iş məhz öz Vətənimizin ərazisindən keçsin. Bu məsələdə bizə Diasporla İş üzrə Dövlət Komitəsindən, Azərbaycan Velosiped Federasiyasından dəstək gəldi. Onlar veloyürüşün Azərbaycandan keçməsi üçün əllərindən gələni etdilər. Beləliklə, biz iyunun 24-də Tbilisidən başladıq, oradan Telaviyə və oradan Balakənə və Qaxa keçdik. Azərbaycan sərhədçiləri, icra məmurları, polisləri bizi çox yaxşı qarşıladılar və yola saldılar.
Sonra Bakıya gəldik. Burada da çox yüksək səviyyədə qarşılandıq. Bu özəl münasibətdən veloyürüşün iştirakçıları çox razı qaldılar. Onlar bu istiqanlılığı, qonaqpərvərliyi dönə-dönə qeyd etdilər.
Bakıda bizim tərəfimizdən bir təşəbbüs də bu oldu ki, ərazi bütövlüyümüz uğrunda şəhid olan qəhrəmanlarımızın övladları ilə görüşərək onların könlünü alaq. Sonra “Ride 25” şirkətinin rəhbəri Rob Hamiltonla birgə 15 şəhid övladına velosiped hədiyyə etdik. Dənizkənarı Milli Parkda hədiyyələrin təqdimatında iştirak edən uşaqlar yüksək əhval-ruhiyyədə yeni velosipedlərini bulvarda sınaqdan keçirdilər. Bir daha yürüşün Azərbaycandan keçməsinə yaratdığı şərait üçün Azərbaycan dövlətinə təşəkkürümü bildirirəm.
Kamran Əzizi əlavə etdi ki, sonda, Diasporla İş üzrə Dövlət Komitəsi tərəfindən velosiped yürüşünün iştirakçılarına Azərbaycan mədəniyyətinə, tarixinə aid kitablar hədiyyə edilib.
Qeyd edək ki, “Ride 25” şirkəti dünyada tanınmış velosiped yürüşləri təşkilatçısıdır. Qurumun məqsədi müxtəlif ölkələr arasında yürüşlər təşkil etməklə, insanları idmana və səyahətə təşviq etmək, eləcə də müxtəlif xeyriyyə layihələrinə dəstək olmaqdır.
Anar ƏLİ
XQ
