Təhsil ocağına gedən səkiləri kimlər zəbt ediblər?!

“Xalq qəzeti”nin 24 aprel 2024-cü il tarixli nömrəsində “Səkilərə kim sədd çəkib?..” sərlövhəli tənqidi məqalə dərc olunub. Yazıda Bakı Dövlət Universitetinə gedən yolda qeyri-qanuni tikinti işlərinin aparıl­masından söhbət açılır. 

Ümid edirdik ki, müvafiq səlahiyyətli qurumlar bu ali məktəb ocağının müəl­lim-tələbə heyətini, eləcə də ətrafda ya­şayan çox sayda sakinləri narazı salan bu məsələ ilə bağlı lazımi tədbirlər görə­cəklər. Təəssüf ki, gözləntilərimiz özünü doğrultmadı. 

Belə ki, 24 may 2024-cü il tarixdə Ya­samal Rayon İcra Hakimiyyətindən aldığı­mız cavab məktubunda yazılır: “Yasamal rayonu Bəxtiyar Vahabzadə küçəsində hasarlanmış torpaq sahəsində vətəndaş Qasımova Aytac Mehdi qızı və Səmədova Günay Mehdi qızı tərəfindən (Bakı Şəhər İcra Hakimiyyətinin 20 aprel 2018-ci il tarixli 262 nömrəli sərəncamı və tərəflər arasında bağlanmış 21 may 2020-ci il ta­rixli 1582 saylı icarə müqaviləsi) əsasında qeyri-yaşayış binası inşa edilir. Tikinti işlə­ri başa çatdıqdan sonra hasar sökülərək səki tam bərpa ediləcəkdir”.

Mənasız cavabdır, eləmi?... Yəni ay müxbir baba, sus otur yerində. Bakı Şəhər İcra Hakimiyyətinin sərəncamı olan yerdə kimin danışmağa nə cürəti var?!

Yanılırlar. Biz qələm əhliyik, böyük Mirzə Cəlilin, dahi Sabirin varisləriyik, başdansovdu cavablara adekvat reak­siya göstərməyə haqqımız və cürətimiz çatır. 

Əvvəlcə, hörmətli səlahiyyət sahib­lərindən soruşmaq istəyirik: Bakı metro­sunun “Elmlər Akademiyası” stansiya­sından üzü Bakı Dövlət Universitetinə gedən Bəxtiyar Vahabzadə küçəsini ha­sarlayaraq, özəl torpaq sahəsinə çevirib vətəndaşlara sərəncamla icarə müqa­viləsi əsasında qeyri-yaşayış binası inşa etdirməyə icazə verməyə qanunlarımız yol verirmi? 

Vermir! 

Hər bir tikinti obyekti üçün boş, isti­fadəsiz torpaq sahəsi ayrılmalıdır. Yal­nız bu halda sərəncam verilməlidir. Əgər bu, yoxdursa, sadəcə hər hansısabir icarə müqaviləsi bağlamaq üçün sərəncam verilibsə, bu, əlbəttə, qeyri-qa­nunidir! Qanunlar isə hər birimiz üçün alidir, toxunulmazdır! Çünki qanunlar dövlətin və xalqın mənafelərini təcəssüm etdirir.

Yasamal RİH rəhbərliyinin bir daha yadına salmaq istəyirik: Söhbət Bəxtiyar Vahabzadə küçəsindəki səkilərdən gedir. Bu səkilərin üstündə göbələk kimi artan sənədsiz, sübutsuz (amma məlum oldu ki, “sənəd”lər var) tikililəri gördükcə, ürə­yimiz qan ağlayır. Hara gedirik bu nəfslə, bu hökmlə, ilahi?!..

Cavab məktubunda belə bir cümlə də yazılıb: “Tikinti işləri başa çatdıqdan sonra hasar sökülərək səki tam bərpa ediləcəkdir”.

Bu cavab vaxtı uzatmaq və baş al­datmaqdan başqa bir şey deyil. Əslində, Bəxtiyar Vahabzadə küçəsində hasarlan­mış səkilərdə tikinti işləri təcili surətdə dayandırılmalıdır. 

Axı bura ölkənin ən böyük elm, təhsil məbədinin yoludur. 2-3 mərtəbəli xidmət və ticarət binalarının inşası başa çatdıq­dan, hasar söküləndən sonra, yeni ob­yektlərin altında qalan səkilər necə tam bərpa oluna bilər?!

Bu şəhərin ruhunu nə vaxta kimi incit­mək olar? Axı, bura bizim evimizdir, qəlbi­mizin bir parçasıdır, yaddaşımızdır, nəfə­simizdir. Qədim Bakının nəfəs yollarının bağlanması ayrıca bir kədərli mövzudur. Bu barədə ayrıca yazmağa hazırlaşırıq. 

Cavab məktubunda, həmçinin yazılıb ki, tərəflər arasında bağlanmış 21 may 2020-ci il tarixli 1582 saylı icarə müqa­viləsi əsasında qeyri-yaşayış binası inşa edilir. Səlahiyyətli orqanlara bir daha mü­raciət edirik: icarə müqaviləsinə sərən­cam verilə bilərmi?!

Yasamal RİH rəhbərliyi sonra yazır ki, qəzet səhifələrində tənqidi məqaləni mü­şayiət edən digər fotolarda əks olunmuş Zahid Xəlilov küçəsi istiqamətindəki ob­yektlərin tikintisi uzun illər bundan qabaq müvafiq sənədlər əsasında aparılmışdır. Deməli, rayon rəhbərliyinin oradakı qa­nunsuzluqları aradan götürmək niyyəti yoxdur?! 

Bəs, Azərbaycan Respublikası Tikin­tiyə Nəzarət, Şəhərsalma və Arxitetektu­ra Komitəsinin rəhbərliyi şəhərin Bəxtiyar Vahabzadə və Zahid Xəlilov küçələrində­ki qanunsuz inşaat işləri barədə nə düşü­nür? İnanmaq istərdik ki, komitə tezliklə öz prinsipial mövqeyini ortaya qoyacaq! 

P.S. BDU-ya gedən küçələrin sə­kilərini zəbt etməyə heç kimin nə hüquqi, nə də mənəvi haqqı var. Hör­mətli məmurlar! Gəlin, bu həqiqəti unutmayaq. 

Kəmalə ABDİNOVA
XQ