Cəfər Cabbarlı adına Respublika Gənclər Kitabxanasında uzun illər Zaqatala Rayon Mərkəzləşdirilmiş Kitabxana Sisteminin direktoru vəzifəsində çalışmış Gülniyar Qurbanqızının Zaqatala şəhidlərinə və döyüşçülərinə həsr olunmuş “Vətən fədailəri” adlı 1-ci və 2-ci kitablarının təqdimat mərasimi keçirilib. 

Mərasimdə Azərbaycan Ədəbiyyat Fondunun baş direktoru, Azərbaycan Ya­zıçılar Birliyi İdarə Heyətinin üzvü Varis Yolçuyev, tanınmış yazıçı, tarixi roman­ların müəllifi Yunus Oğuz, Vətən mühari­bəsi iştirakçıları, şəhid ailələri, Bakı Döv­lət Universitetinin informasiya və sənəd menecmenti fakültəsinin tələbələri və kitabxana əməkdaşları iştirak ediblər. 

Ulu öndər Heydər Əliyevin və şə­hidlərin xatirəsi bir dəqiqəlik sükutla yad edilən toplantını açan kitabxananın direk­toru Aslan Cəfərov Şanlı Zəfər tarixinə nəzər salaraq böyük sərkərdə, Ali Baş Ko­mandan cənab Prezident İlham Əliyevin müdrik siyasəti, rəşadət göstərən əsgər və zabitlərimizin qəhrəmanlığı sayəsin­də düşmənə sarsıdıcı zərbələr endiril­diyini və bununla da, tariximizə yeni bir səhifənin yazıldığını söyləyib. O, Vətən uğrunda canından keçmiş Azərbaycan oğullarının həyat hekayələrinin əsl örnək olduğunu bildirərək bu mövzuda qələmə alınan əsərlərin əhəmiyyətindən danışıb. Gülniyar Qurbanqızının “Vətən fədailəri” kitablarının bədii dəyərini açıqlayıb. 

Tarixi romanlar müəllifi, yazıçı Yu­nus Oğuz, Azərbaycan Ədəbiyyat Fon­dunun Baş direktoru, Avrasiya Millətlər Assambleyası Ədəbiyyat Şurasının həmsədri Varis Yolçuyev, kitabxananın əməkdaşı Lamiə Sarıyeva, Vətən mü­haribəsi iştirakçıları – mayor Yusif Hüm­bətov, baş leytenant Pətərək Fərzəliyev, qazi Vüsal Səttarov döyüş xatirələrini tədbir iştirakçıları ilə bölüşərək, yüzlər­lə poladların, mübarizlərin, xudayarların qisasının döyüş meydanında alındığını, şəhidlərimizin qanlarının yerdə qalma­dığını böyük qürur hissi ilə dilə gətirib­lər. Gülniyar xanımın zəhmətini yüksək dəyərləndiriblər. 

Şəhid ailələrinin üzvləri oğullarının qəhrəmanlığı ilə qürur duyduqlarını, on­ların həyat hekayələrinin qələmə alın­masından razı qaldıqlarını bildiriblər. Gülniyar Qurbanqızı bir elin qəhrəman oğullarından bəhs edən bu kitabların yazılmasına kömək etmiş şəhid ailələ­rinə dərin hörmət və ehtiramını bildirərək təqdimatın təşkilatçılarına minnətdarlı­ğını çatdırıb.

Əli ƏLİYEV
XQ