DOST Agentliyində Dünya Bankının Avropa və Mərkəzi Asiya regionu üzrə vit­se-prezidenti Antonella Bassani ilə görüş ke­çirilib. Mərasimdə qurumun Cənubi Qafqaz üzrə regional direktoru Rolande Prays, ölkə meneceri Stefanie Stallmeister və başqa nü­mayəndələr iştirak edib.

A.Bassani və digər qonaqlar əvvəlcə DOST Agentliyinin 1 saylı DOST Mərkəzi ilə tanış olublar. Qonaqlara DOST Agentliyi və DOST Mərkəzləri barədə məlumat veri­lib. Birinci vitse-prezident Mehriban xanım Əliyevanın təşəbbüsü olan DOST konsep­siyasının əmək, məşğulluq, sosial müdafiə sahələrində 159 xidmətin vahid platformadan, “bir pəncərə”dən, şəffaf və operativ, vətəndaş məmnunluğuna uyğun təqdim olunmasına imkan yaratdığı vurğulanıb.

DOST mərkəzlərində ötən dövrdə 2,1 milyon nəfərə xidmət göstərildiyi, bu xidmət­lərdən vətəndaş məmnunluğu səviyyəsinin 98,2 faiz olduğu qeyd edilib. DOST konsep­siyasının beynəlxalq səviyyədə də yüksək dəyərləndirildiyi, artıq 20-dən çox beynəlxalq mükafatla təltif edildiyi, bir sıra ölkələrin də bu təcrübənin tətbiqində maraqlı olduğu diqqətə çatdırılıb. Qonaqlar, həmçinin nazir­lik və Dünya Bankının birgə icra etdiyi “Məş­ğulluğa Dəstək Layihəsi”nin bir qrup iştirak­çısı ilə görüşüblər. 

Görüşdə əmək və əhalinin sosial müdafiə­si naziri Sahil Babayev ölkəmizdə əmək, məş­ğulluq və sosial müdafiə sahələrində aparılan islahatları və əldə olunan nailiyyətləri diqqətə çatdırıb. Həmin islahatlar prosesində Dünya Bankı ilə əməkdaşlığa xüsusi önəm verildiyi vurğulanıb. Birgə icra olunan “Məşğulluğa Dəstək Layihəsi”nin 22 min işsiz şəxsin ki­çik biznesə çıxışına dəstək məqsədi daşıdığı, artıq 14 min işsiz şəxsin bu layihənin dəstəyi ilə kiçik biznesini qurduğu qeyd edilib. Ha­belə əmək qanunvericiliyinin, əlilliyin qiy­mətləndirilməsi sisteminin təkmilləşdirilmə­si, övladlığagötürmə sahəsində potensialın gücləndirilməsi və s. istiqamətlərdə birgə layihələrin əhəmiyyətindən bəhs olunub. Həs­sas qrupların əmək bazarına çıxışının dəstək­lənməsi üçün icra olunan aktiv məşğulluq proqramları barədə məlumat verilib.

A.Bassani nazirliyin Dünya Bankı ilə fəal əməkdaşlığından məmnun olduğunu, ölkə­mizdə aparılan sosial islahatlarla bağlı müs­bət fikirlərini diqqətə çatdırıb. Sonra Əmək və Əhalinin Sosial Müdafiəsi Nazirliyi ilə Dün­ya Bankının mövcud əməkdaşlıq gündəliyi və gələcək əməkdaşlıq perspektivləri müzakirə edilib.

Z.HÜSEYN
XQ