Bakının Dənizkənarı bulvarı çox gözəldir. Sakit, küləksiz havalarda daha da könülaçan olur. Belə günlərdən birində Xəzərdən əsən ilıq meh saçlarıma sığal çəkirdi…
Dövlət Kukla Teatrının arxasındakı bağda oturacaqlardan birində əyləşib rəfiqəmi gözləyirdim. Birlikdə teatra gedəcəkdik. Nədənsə, o, gecikirdi, mən isə bulvardakı gözəlliklərə heyranlıqla baxırdım.
Birdən bir dəstə göyərçin mənə tərəf uçdu. Çaşıb qaldım, əvvəlcə elə bildim ki, quşların hücumuna məruz qalmışam. Amma göyərçinlər başımın üstündən keçib yanaşı oturacaqda əyləşən ahıl kişini dövrəyə aldılar.
Qoca əlindəki salafan paketdən çörək qırıntılarını çıxardıb quşları yemləməyə başladı. Göyərçinlər bir-birinə mane olmadan bu yemi sonadək dənlədilər. Mənzərə o qədər gözəl idi ki…
Qoca arada yerini rahatlayıb bir ayağını o biri ayağının üstünə aşırdı. Onun bu hərəkətindən göyərçinlərdən bir-ikisi hürkdü. Kişi dərhal ayaqlarını əvvəlki vəziyyətinə qaytardı və elə bil, nəfəsini də içinə çəkdi ki, təki quşlar diksinməyib onun payını rahat yesinlər.
Birdən bizə tərəf qaça-qaça gələn rəfiqəm göyərçinlərin düz ortasından keçib, mənə çatdı. Göyərçinlər pərən-pərən oldu, qoca oturduğu yerdən dik qalxıb bizə tərəf döndü və hər ikimizə qınayıcı bir qəzəblə baxdı.
Rəfiqəmin məni qucaqlamaq üçün havada qalmış qolları arasından qocaya yaxınlaşıb sakit tərzdə “bağışlayın” dedim. Qoca acı-acı gülümsündü və heç nə demədi…
Sonra geri qayıdıb rəfiqəmin qolundan tutub oradan uzaqlaşdım ki, qoca göyərçinləri rahat yemləyə bilsin. Rəfiqəm isə təəccüblə mənə baxırdı, göyərçinlərin o sevincli anlarına biganəliyin fərqində deyildi…
Ramilə QURBANLI
XQ