Qarabağ xilaskarlarına Türkiyədə ehtiram
“Tərxis Olunmuş Hərbçilərin Gəncləri Maarifləndirmə” İctimai Birliyinin təşkilatçılığı ilə bir qrup Vətən müharibəsi iştirakçısı qardaş Türkiyədə səfərdə olub. Bu barədə Əmək və Əhalinin Sosial Müdafiəsi Nazirliyi yanında İctimai şuranın üzvü Emil Həsənli məlumat verib. İctimai birliyin sədri XQ-yə bildirib:
– Türkiyə Müharibə Qaziləri Dərnəyinin dəvəti ilə təşkil edilən səfər zamanı Türkiyə Respublikasının vitse-prezidenti Cevdət Yılmaz, milli müdafiə naziri Yaşar Gülər, ailə və sosial xidmətlər nazirinin müavini Sevim Sayım Madak, Türkiyənin Baş Qərargah rəisi, ordu generalı Mətin Gürak və digər rəsmilərlə görüşlər keçirilib. Aparılan söhbətlərdə iki ölkə arasında münasibətlərin dövlət başçılarının birgə səyləri ilə strateji tərəfdaşlıq səviyyəsinə yüksəldiyi vurğulanıb. Qardaş ölkənin rəsmiləri Azərbaycanın Vətən müharibəsi iştirakçılarını Türkiyədə görməkdən məmnunluqlarını bildirib, ölkəmizin tarixi Zəfərinin onlarda sonsuz qürur hissi doğurduğunu vurğulayıblar.
Müharibə iştirakçıları Mərsin və Adananın işğaldan azad olunmasının 102-ci ildönümü ilə bağlı tədbirlərdə də iştirak ediblər. Onlar Türkiyə Böyük Millət Məclisində, Təqaüdçü Astsubaylar dərnəyində, Mərsin və Adana valiliklərində, Böyükşəhər Bələdiyyəsində, Ömər Halisdəmir adına Mədəniyyət Mərkəzində və digər qurumlarda görüşlər keçiriblər.
E.Həsənli Azərbaycan və Türkiyənin hərbiyönümlü təşkilatları arasında əməkdaşlıq çərçivəsində ildə bir neçə dəfə qarşılıqlı səfərlər təşkil edildiyini də bildirib. O, iki ölkənin hərbiyönümlü QHT-ləri arasında əməkdaşlığın genişləndirilməsini, təcrübə mübadilələri aparılmasını bu səfərlərin əsas məqsədi olduğunu qeyd edib.
Ötən il pensiya ödənişləri 5,7 milyard manat artıb
Əmək və Əhalinin Sosial Müdafiəsi Nazirliyindən bildiriblər ki, 2023-cü ildə pensiya ödənişlərinə əvvəlki ilə nisbətən 16 faiz və ya 781 milyon manat çox olmaqla 5 milyard 726 milyon manat yönəldilib.
Növbəti pensiya artımları olaraq ötən il minimum pensiya 280 manata çatdırılıb. 2022-ci ildə pensiyaçılara ödənilən maddi yardımların onların pensiyaları tərkibinə daxil edilərək, bundan sonra yaranan pensiya məbləğlərinin 14,7 faiz indeksləşdirilərək artırılması təmin olunub. Həmin dövrdə pensiyaların orta aylıq məbləği 17 faiz artaraq 436 manata, yaşa görə pensiyaların orta aylıq məbləği də 17 faiz artaraq 467 manata çatdırılıb.
Son bir ildə 31 min 800, elektron təyinat mexanizminin tətbiqinə başlandığı 2019-cu ilin əvvəlindən isə 102 min vətəndaşa proaktiv qaydada pensiya təyin olunub.
Zərifə BƏŞİRQIZI
XQ