Hər il olduğu kimi, bu il də Bakının mərkəzi küçələrində bir neçə yolka qurulub. İnsanları bayram əhval-ruhiyyəsinə kökləyən yolkalardan biri də “Azneft” meydanındadır. Fərqli dizayn ilə qurulan yolka zövqlə hazırlanıb.
Yolka, xüsusilə, axşamlar parlaq görünüşü ilə buradan ötənləri heyran edir. Meydanda dalğalanan üçrəngli Azərbaycan bayrağı isə yolkanın gözəlliyinə gözəllik qatır, onun görünüşünü daha əzəmətli edir.
Paytaxtda, həmçinin qarşıdan gələn əlamətdar gün münasibətilə xüsusi hazırlıq və tərtibat işləri həyata keçirilib. Artıq şəhərin parkları, meydan və küçələri çilçıraqlar və digər bəzəklərlə işıqlandırılıb. İnsanların ənənəvi gəzinti yerlərində – Dənizkənarı Parkda, Fəvvarələr meydanında, digər parklarda və bağlarda da şam ağacları bəzədilib və əvvəlki illərdən fərqli olaraq xüsusi proqram əsasında bayram hazırlıqları görülüb.
Bulvar ərazisində Yeni ilin rəmzlərindən ibarət rəngarəng kompozisiyalar, uşaqların zövqünü oxşayan çoxsaylı oyuncaq evlər də qurulub.
Bütün bunlar, şəhər sakinlərini və qonaqları bayram əhval-ruhiyyəsinə kökləyir.
Fidan SALMANOVA
Elşən AĞALAR (Foto)
XQ
