Şaxtalı hava ürək-damar sistemi zəif olanlar üçün təhlükə mənbəyidir. Rusiyalı kardioloq Vladimir Xoroşev tranzitor işemik atak və infarkt keçirən xəstələrə xəbərdarlıq edib.
O deyib ki, şaxtalı havalarda ehtiyatlı olmaq lazımdır. Hipertoniya, ürək xəstəliyi, beyin qan dövranı pozğunluğu olan xəstələrə şaxta neqativ təsir göstərir.
Yaşlı adamlar soyuq havalarda küçədə, həyətdə iş görsələr, məsələn, qar təmizləsələr, damar tutmalarından vəziyyətləri pisləşə bilər. Buna görə də insanlar qar təmizlədikdə, yaxud hər hansı iş gördükdə, şaxtalı havada gəzdikdə 5 dəqiqədən bir fasilə verməlidir. Əgər aktiv hərəkət zamanı zəiflik, spazm, ürəkdə tövşümə yaranırsa, mütləq həkimə müraciət etmək lazımdır.
Ürək problemləri olanlar qışda pilləkənlə, ekskalatorla az çıxıb-düşməli, metrodan istifadə etməməlidir. Eləcə də soyuqdan istiyə, istidən soyuğa qəfil keçmək olmaz.
Evdən çıxanda dəhlizdə bir-iki dəqiqə dayanıb, bir neçə dəfə dərindən nəfəs alıb vermək tövsiyə olunur.
Z.HÜSEYNLİ
XQ