Qədim zamanlardan şüyüd müalicəvi məqsədlərdə çox geniş istifadə olunub. Ondan ətirli və dadlı göyərti kimi xörəklərdə, salatlarda bol-bol istifadə edilib. Şüyüdün toxluq hissi yaradan xüsusiyyəti var. Pəhriz həkimlərinin fikrincə, şüyüddən çox faydalı və dadlı müalicəvi çay da hazırlamaq olar
Bu çay həzmi yaxşılaşdırır, orqanizmi köpdən azad edir. Hətta yeni doğulmuşlara həkimlər şüyüd çayı tövsiyə edirlər. Qəbizlik zamanı böyük faydası olan çay, həm də, daxili orqanları, xüsusən, bağırsaqları ziyanlı maddələrdən təmizləyir. Şüyüd çayı yeməklə (çox yağlı, qızarmış, duzlu) bağlı artan təzyqi aşağı salır. Bronxların soyuqlamasında xüsusilə təsirlidir. Quru öskürəyi yumşaldır, həmçinin nəfəs yollarını mikroblardan və selikdən təmizləyir. Şüyüd çayının sidikqovucu təsiri də var. Eyni zamanda, sidik yollarını təmizləyir.
Şüyüd çayını hazırlamaq çox asandır. Bunun üçün 1 xörək qaşığı xırda doğranmış şüyüd götürülür və 1 stəkan isti (qaynar olmaz) suda 30 dəqiqə ərzində dəmlənilir. Sonra süzülür və gündə 3 dəfə stəkanın 1/3 hissəsi miqdarında içilir. Çaya bal və limon əlavə etmək olar. Bu, onun faydasını daha da artırır.
Z.HÜSEYNLİ
XQ
