Azərbaycan Hərb Tarixi Muzeyində Vətən Müharibəsi Veteranları İctimai Birliyi və 701 saylı hərbi hissənin Müharibə Veteranları Şurasının dəstəyi ilə Ordumuzun təməl daşı olan 18110 - 701 saylı briqadanın yaradılmasının 32 illiyinə həsr edilmiş “Fədailər” adlı tədbir keçirilib.
Bu münasibətlə 701 saylı hərbi hissənin müharibə veteranları şurasının üzvləri, hərbi hissənin keçmiş döyüşçüləri, veteranlar oktyabrın 9-da Şəhidlər xiyabanına gələrək Azərbaycanın müstəqilliyi və ərazi bütövlüyü uğrunda mübarizədə canlarından keçmiş qəhrəman Vətən övladlarının xatirəsini anıb, “Əbədi məşəl” abidəsinin önünə əklil qoyublar.
Tədbirdə hərbi hissənin müharibə veteranları şurasının sədri, ehtiyatda olan polkovnik Əzizağa Qənizadə çıxış edərək 701 saylı hərbi hissənin yaranma tarixi, keçdiyi şanlı döyüş yolu ilə bağlı məlumat verib. Vurğulayıb ki, Azərbaycan Respublikasının suverenliyini və ərazi bütövlüyünü təmin etmək üçün oktyabrın 9-da ilk desant hücum taboru - 18110 saylı hərbi hissə yaradılıb, 1992-ci ilin mart ayından adı dəyişdirilərək Şərqin ilk demokratik Respublikasının 701 gün yaşaması şərəfinə “701” adlandırılıb. Briqadanın şəxsi heyəti – əsgərdən tutmuş yüksək rütbəli zabitə kimi Qarabağ müharibəsi zamanı bütün əməliyyatların ən gərgin nöqtələrində öz vəzifələrini böyük qətiyyətlə yerinə yetirib. Şuşa rayonunun kəndlərinin, həmçinin Ağdərə, Kərkicahan, Tərtər, Xocalı, Kəlbəcərin müdafiəsi uğrunda gedən qanlı döyüşlərdə, Daşaltı, Füzuli və Murovdağ istiqamətindəki hücum əməliyyatlarında iştirak edərək böyük qəhrəmanlıq və rəşadət göstərib: “Döyüşlərdə göstərdikləri qəhrəmanlıqlara görə 701-ci briqadanın əsgər və zabitlərindən 4-ü Azərbaycanın Milli Qəhrəmanı adına, 11-i “Azərbaycan Bayrağı” ordeninə layiq görülüb, 18-i isə “İgidliyə görə” medalı ilə təltif edilib.
Bu gün 701 saylı hərbi hissənin veteranları gənclərdə hərbi vətənpərvərlik ruhunu yüksəltmək istiqamətində gərgin iş aparır. Artıq 701 saylı briqadanın döyüş yolu Müdafiə Nazirliyinin tədris müəssisələrində ətraflı öyrənilir”.
Azərbaycan Vətən Müharibəsi Veteranları İctimai Birliyinin sədri Füzuli Rzaquliyev, həmin hərbi hissənin tərbiyəvi işlər üzrə müavini, müharibə veteranı İntiqam Mirzəyev, ehtiyatda olan polkovnik-leytenant Qurban Qurbanov çıxışlarında briqadanın keçdiyi döyüş yolundan söhbət açıb, hərbçilərimizin göstərdikləri qəhrəmanlığın təbliğinin gənclərin hərbi vətənpərvərlik ruhunda tərbiyəsi işində vacib rol oynadığını vurğulayıblar.
Leyla QURBANOVA
XQ
