HƏMAS yaraqlıları isə raket zərbələrini davam etdirirlər

İsrailin Baş naziri Binyamin Netanyahunun şənbə günü ölkəsinin HƏMAS-a qarşı müharibədə olduğunu bəyan etməsindən sonra Nazirlər Kabineti müva­fiq qərar verib. Kabinetin səsverməsindən öncə Netanyahu İsrailin HƏMAS-dan “möhtəşəm qisas” alacağını bildirib. 

Bu gün artıq dördüncü gündür ki, Yaxın Şərqdə barışmaz hesab olunan rəqiblər arasında son 50 ilin ən qan­lı silahlı qarşıdurması baş verir. Dünən İsrailin cənubundakı şəhərlər boyunca küçələrdə İsrail əsgərləri ilə HƏMAS ya­raqlıları arasında ağır döyüşlər davam edib. Eyni zamanda, İsrail təyyarələri Qəzzadakı hərbi hədəflərə zərbələr en­dirib. 

İsrailin Müdafiə Qüvvələri tərəfindən Qəzza sektorunda artıq mindən çox hər­bi hədəfin vurulduğu qeyd edilib. Bununla bərabər, nazirliyin rəsmisi həmin bölgə­dən ölkənin ərazisinin raket atəşinə tu­tulduğunu deyib. Hər iki tərəfdən ölən və yaralananların sayı durmadan artır. 

Qəzzada hazırda ağır humanitar böh­ran yaşanır. Əhalinin elektrik enerjisi və su qıtlığından kəskin əziyyət çəkdiyi bil­dirilir. BMT-nin dünən gecə saatlarında yaydığı son hesabata əsasən, 120 min­dən çox fələstinli yaşadıqları evləri tərk etməyə məcbur qalıb və onlardan 74 mini məktəblərə sığınıb. Qeyd edək ki, Qəzza bölgəsində 2,3 milyondan çox əhali yaşa­yır və bu ərazi dünyanın ən sıx məskun­laşmış yerlərindən biridir. 

Yaxın Şərqdə baş verənlər dünya birjalarında enerji qiymətlərinin kəskin artmasına səbəb olub. Analitiklər baha­laşmanın hərbi eskalasiyadan sonra neft daşımalarında fasilələrin yaranacağı eh­timalından qaynaqlandığını bildirirlər.

İsrail ordusu HƏMAS-ın ələ keçirdi­yi bütün ərazilərdə nəzarəti bərpa edib. Bu barədə İsrail Müdafiə Ordusunun nü­mayəndəsi, kontr-admiral Daniel Həcəri məlumat verib. Onun sözlərinə görə, ha­zırda həmin ərazilərin heç birində hərbi əməliyyatlar aparılmır.

ABŞ dövlət katibi Entoni Blinken CNN telekanalına eksklüziv müsahibəsində deyib ki, Birləşmiş Ştatlar döyüşlər za­manı həlak olanlar arasında amerikalıla­rın da olması ilə bağlı xəbərləri araşdırır.

Xatırladaq ki, ABŞ hökuməti yüzlərlə mülki vətəndaşın ölümü ilə nəticələnən terror hücumundan sonra İsrailə dəstək üçün özünün ən yeni və ən qabaqcıl təy­yarədaşıyan gəmisini tam aviadaşıyıcı zərbə qrupu ilə birlikdə regiona göndərib.

Müdafiə naziri Lloyd Ostin verdiyi açıqlamada ABŞ-ın “regional çəkindirmə səylərini gücləndirmək üçün Müdafiə Na­zirliyinin bölgədəki mövqeyini gücləndir­mək” məqsədilə “USS Gerald R. Ford” təyyarədaşıyan gəmisinin zərbə qrupunu Aralıq dənizinin şərqinə köçürdüyünü açıqlayıb.

Bundan əlavə, müdafiə naziri ABŞ-ın Yaxın Şərqdə ABŞ Hərbi Hava Qüvvələ­rinin “F-35”, “F-15”, “F-16” və “A-10” dö­yüş təyyarələri donanmasını gücləndir­mək üçün addımlar atdığını bildirib.

Oxucular bu məqamda haqlı olaraq fələstinlilərlə israillilər arasında son qanlı toqquşmaların nə səbəbdən başladığını soruşa bilərlər. BBC müxbiri Qüdsdən yazır ki, Fələstin ərazilərinə nəzarət edən silahlı HƏMAS qrupu, Qüdsün “Əl-Əqsa” məscidini İsrailin “təcavüz və terrorizmin­dən” qorumaq üçün səy göstərdiyini bə­yan edib. 

Məlum olduğu kimi, həmin ərazini həm müsəlmanlar, həm də yəhudilər özləri üçün müqəddəs hesab edirlər. Bir müddət əvvəl fələstinlilərin Şərqi Qüds­dəki evlərindən qovulmaq təhlükəsi ilə üzləşməsi onların qəzəbinə səbəb olub. 

Belə ki, İsrail məhkəməsi Şərqi Qü­dsdə Şeyx Cərrah məhəlləsində bir neçə fələstinli ailənin evlərindən çıxarılması barədə qərar verib. Məhkəmə qərarında əsas kimi həmin evlərin keçmişdə, daha dəqiq desək, 1947-ci ilə qədər yəhudilərə məxsus olduğu göstərilib.

Qərardan sonra Qüdsün əsasən ərəb əhalisinin yaşadığı hissəsində etirazçılar­la İsrail polisi arasında bir ayadək davam edən toqquşmalar başlayıb. İsrail polisi isə müsəlmanlara “Əl-Əqsa” məscidinə girişi qadağan edib. Bu hadisə fələstin­lilərin qəzəbini daha da artırıb.

Fələstinlilər İsrail polisini daşa tutub, İsrail polisi isə kütləni dağıtmaq üçün rezin güllələrlə atəş açıb, nəticədə 300-dək insan xəsarət alıb. Bunun ardınca HƏMAS təşkilatının hərbiləşdirilmiş qa­nadı İsrail ərazisini atəşə tutmağa baş­layıb.

Hadisələrin sonrakı gedişatı artıq bəllidir. Oktyabrın 7-də səhər tezdən HƏ­MAS yaraqlıları İsrail ərazisinə beş minə yaxın raket atıblar. Bundan başqa, yaraq­lılar bir neçə istiqamətdə İsrail ərazisinə soxularaq onlarla həbçini və dinc sakini əsir götürüb. 

Ötən gün ABŞ, Avropa İttifaqı və Britaniya hər iki tərəfi ən qısa zaman­da gərginliyi azaltmağa çağırıblar. Bu məsələ ilə bağlı Türkiyə və Rusiya pre­zidentləri arasında telefon danışığı olub. Türkiyə və Rusiya liderləri, eləcə də bir çox ölkələrin və beynəlxalq təşkilatların rəhbərləri tərəfləri munaqişəyə son qoy­mağa səsləyiblər.

BMT-nin Yaxın Şərqdə rəsmisi Tor Wennesland bildirib ki, İsraillə fələstin­lilər arasında son münaqişədəki hazırkı vəziyyət “tammiqyaslı müharibə həddinə yaxınlaşıb”. O, gərginliyin azaldılması üçün beynəlxalq səylərin artırılmasını va­cib sayır. 

Sonda bildirək ki, HƏMAS-ın hücum­ları nəticəsində İsraildə ölənlərin sayı 900-ə çatıb, 2616 nəfər yaralanıb. Qəzza zolağında isə ölənlərin sayının dörd yüz nəfəri keçdiyi bildirilir. Təəssüf ki, bölgə­də ağır zorakılıqlar davam edir və nə vaxt bitəcəyi bəlli deyil. 

M.HACIXANLI
XQ