Bu bahalı əyləncə 60 milyon dollara başa gəlir

Bakıda keçirilən 74-cü Beynəlxalq Astronavtika Konqresi çərçivəsində oktyabrın 6-da Beynəlxalq Astronavtika Federasiyasının təşkilatçılığı və “Azərkosmos”un tərəfdaşlığı ilə “Astronavtlar sessiyası: “Kosmosun populyarlaşması – kosmos insanları ilə tanışlıq” mövzusunda plenar iclas keçirilib.

Heydər Əliyev Mərkəzinin Auditoriya zalında baş tutan sessiyada moderator almaniyalı astronavt, Ştutqart Universi­tetinin astronavtika üzrə professoru Re­inold Evald olub. Plenar iclasda TUA-nın(Türkiyə Uzay Ajansı) nümayəndəsiastronavt Tuva Cihangir Atasever, “Blue origin” şirkətinin astronavtı Viktor Hespanha, Rusiyadan “Roskosmos”un nümayəndəsi astronavt Anna Yuryevna Kikina, NASA-nın Kosmik Araşdırma­lar Assosiasiyasından (ASE) astronavt John David Bartoe və misirli astronavt Sara Sabry çıxış ediblər.

Kosmosda həyat tərzi, yanaşma və kosmik fəaliyyətlər barədə məlumatı bölüşən astronavtlar gənclərə bu sahə­nin sirlərindən danışıblar. Kosmosda zamanın çox sürətlə keçdiyini vurğu­layan astronavtlar, kosmosa yollan­mazdan öncə keçdikləri asan olmayan məşqlərdən də söz açıblar.

“Bu günlərdə insanları kosmosa aparmağın yeni yollarının çoxaldığını görürük. Kosmos öz orijinal, eksklüziv xarakterini itirirmi? Biz – kosmos sə­yahətçiləri kosmosa buraxılış motivləri haqqında düşünürük. Çünki artıq hər kəs, astronavt olmadan belə kosmosa yollana bilər. 2022-ci ildə “Artemis-1” missiyasının pilotsuz “Orion” kosmik gəmisi Ayın ətrafında uğurlu dövrə vur­du. Bu, insanların Yerin peykinə uçma­sına və ora enməsinə hazırlıq mərhələ­si idi. 2024-cü ildə isə bizi Ay missiyaları gözləyir", – deyə R.Evald əlavə edib.

Qeyd olunub ki, “Orion” missiyasın­dan sonra NASA bu uğuru inkişaf etdir­mək və Aya yeni ekspedisiyalar göndər­mək niyyətindədir. Məqsəd 2025-ci ilə planlaşdırılan pilotlu uçuşlardan əvvəl orada elmi təcrübələr həyata keçirmək və avadanlıqları sınaqdan keçirməkdir. 

Bildirilib ki, kosmik turizm sahəsi də sürətlə inkişaf edir. Bu, bahalı əyləncə­dir – təxminən, 60 milyon dollara başa gəlir. 

Anna Yuryevna Kikina isə bildirib ki, turist kimi ilk dəfə 2021-ci ildə Rusi­yanın “Soyuz” kosmik gəmisində Bey­nəlxalq Kosmik Stansiyada olub. O, öz təcrübəsini iştirakçılarla bölüşüb. 

John David Bartoe qeyd edib ki, Avropa Kosmik Agentliyi apreldə Yupi­terdə tədqiqat aparmaq üçün kosmosa aparat göndərməyi planlaşdırır. Bu mis­siya 13 il davam edəcək.

İclasda iştirakçıları maraqlandıran suallar cavablandırılıb.

Sərgidə fəal iştirak edən ölkələr mükafatlandırılıb

“Azərkosmos”un sərgi pavilyo­nunda stendlərin mükafatlandırılma­sı mərasimi keçirilib.

Səudiyyə Ərəbistanı, İtaliya Kos­mik Agentliyi (ən innovativ stend), Çin Astronavtlar Assosiasiyası, “Airbus” şirkətinin nümayəndələri (ən kreativ), Yaponiyanın JAXA Kosmik Agentliyi, Polşa Kosmik Agentliyi (ən fəal), Mila­nın “Plan-S” şirkəti və Türkiyə Kosmik Agentliyinin (ən işgüzar) stendləri mü­kafatlandırılıblar.

Astronavtlar Uşaq-Gənclər İnkişaf Mərkəzində 

Respublika Uşaq-Gənclər İnki­şaf Mərkəzində rumıniyalı astronavt Dumitru Dorin Prunariu və braziliyalı astronavt Viktor Hespanha ilə mək­təblilər arasında görüş keçirilib. 

Astronavtlar kosmik missiya və kos­mosa uçuş təcrübələrini bölüşüblər. sual-cavab sessiyası keçirilib, ekoklub üzvləri üçün avtoqraf imzalanması mə­rasimi və fotosessiya təşkil edilib.

Astronavtlarla görüşdə Respublika Uşaq-Gənclər İnkişaf Mərkəzinin ekok­lubunun 100-dək üzvü iştirak edib. 

XQ