Seçki Məcəlləsinə dəyişiklik zəruridir
“Qarşıdan parlament seçkiləri gəlir və ona görə də Seçki Məcəlləsinə ciddi dəyişikliklər edilməlidir”. Bu təklifi Milli Məclisin komitə sədri Siyavuş Novruzov irəli sürüb. Onun sözlərinə görə, mövcud seçki qanunvericiliyi dövrün tələblərinə cavab vermədiyindən effektivliyini itirib: “İstər mövcud şərait, istərsə də “Siyasi partiyalar haqqında” Qanunun qəbul edilməsi Seçki Məcəlləsinə dəyişikliyi zəruri edir. Biz bu məsələyə yenidən baxmalıyıq”.
Sovet maşını olanlar niyə sosial yardım ala bilməz?
Milli Məclisin payız sessiyasının ilk plenar iclasında Siyavuş Novruzov sosial yardımların effektivliyindən söhbət açıb: “Bilməliyik ki, bu sosial yardımlar effekt verir, ya yox? Çünki indiyədək sosial yardımların effektivliyi ilə bağlı heç bir hesabatlılıq həyata keçirilməyib.
Ünvanlı sosial yardımla bağlı da dinləmələrin keçirilməsinə ehtiyac var. Hər il buna 150-300 milyon manat sərf olunur. Bəlkə qaydaları dəyişək ki, daha effektli olsun? Birinin adına köhnə sovet maşını, yaxud torpaq sahəsi olduğu üçün ona ünvanlı sosial müavinət verilmir. Köhnə sovet maşının ünvanlı sosial yardıma nə aidiyyatı var?”
“Matəm günləri” lazımdırmı?
Bu fikiri deputat Fazil Mustafa bildirib. O, bunu Azərbaycanın qalib ölkə olması ilə əlaqələndirib: “Azərbaycan artıq dünyada qalib ölkə kimi qəbul edilir. Qalib dövlətin ancaq qələbə günləri olmalıdır. Artıq yeni dövrə başlamaq lazımdır. Matəm günlərinin təqvimdən çıxarılmasına baxılmalıdır. 31 Mart və digər bunun kimi günlər də bura aid edilməlidir”.
Qərbi azərbaycanlılar Qarabağa köçürülməlidir
“Azərbaycan bu günlərdə öz tarixinin ən şanlı səhifələrini yazır, xalqımız özünün ən qürurlu günlərini yaşayır”. Bu fikirləri parlamentin payız sessiyasında deputat Qüdrət Həsənquliyev səsləndirib.
O bildirib ki, bugünkü Ermənistan ərazisindən acımasızcasına, işgəncələrə məruz qoyularaq, təhqir olunaraq qovulmuş soydaşlarımız Qarabağı tərk etmiş, Azərbaycan vətəndaşlığını qəbul etməyən separatçıların yaşadığı Xankəndi və digər yaşayış məntəqələrinə köçürülməlidir: “Həm də bunu bacardıqca tez etməliyik”.
20 Sentyabr “Bütövlük Günü” olsun!
Deputat Zahid Oruc maraqlı təkliflə çıxış edib: “Antiterror tədbirləri 44 günlük Vətən müharibəsinin davamıdır. Buna görə, nəticələr 45 günlük müharibə kimi simvollaşa, Azərbaycanın siyasi təqviminə qızıl hərflərlə yazıla bilər”.
O təklif edib ki, soyqırımı, kütləvi insan və torpaq itkiləri yaşayan bir xalqın 8 noyabrda qazandığı Zəfərin davamı olaraq, 20 sentyabrı “Bütövlük günü” kimi qeyd edək və onu rəsmiləşdirək: ”Bu, hər bir azərbaycanlının, bütövlükdə xalqımızın iradəsini əks etdirir”.
Hazırladı:
Ə.BƏDƏLOV
XQ
