Azərbaycan Dili və Ədəbiyyatı Forumu başa çatdı
Ölkəmizdə ilk dəfə keçirilən və geniş elmi-ədəbi ictimaiyyətin cəlb olunduğu söz-sənət bayramı ötən bazar günü tarixə qovuşdu və orada qaldırılan məsələlərin, səsləndirilən fikirlərin, verilən əməli təkliflərin ümumiləşdirilərək, “Azərbaycan mədəniyyəti–2040” Dövlət Proqramına daxil edilməsi qərara alındı.
Heydər Əliyev Fondu ilə Mədəniyyət Nazirliyinin təşkilatçılığı, Elm və Təhsil Nazirliyinin, Azərbaycan Milli Elmlər Akademiyasının dəstəyi ilə keçirilən forum sentyabrın 1-də Şamaxıda başlanıb, sonrakı 2 gündə isə Bakının “Gülüstan” sarayında davam edib. Panel formatında təşkil olunan iclaslarda qloballaşma kontekstində ana dilimizin qorunması, milli ədəbiyyatımızın cəmiyyətə çatdırılması metodikası, teatr və kinonun inkişafında ədəbiyyat faktoru, uşaq ədəbiyyatının ideoloji mahiyyəti, dil və tərcümə problemləri, kitab nəşri kimi məsələlər ətraflı müzakirə edilib.
Ümummilli lider Heydər Əliyevin100 illik yubileyinə həsr olunan tədbirlər çərçivəsində təşkil edilmiş forumun son panel iclasında Mədəniyyət Nazirliyinin nümayəndələri, Milli Məclisin deputatları, elm və mədəniyyət xadimləri, qonaqlar iştirak ediblər. Azərbaycan ədəbiyyatına və M.F.Axundzadə adına Azərbaycan Milli Kitabxanasının 100 illik yubileyinə həsr olunan videoçarxların nümayişi maraqla qarşılanıb. Tarixi-xronikal və son dövrlərin videokadrları vasitəsilə milli ədəbiyyatımızın inkişaf yoluna, həmçinin Prezident sərəncamı ilə 1 əsrlik yubileyinə hazırlıq görülən “Axundov kitabxanası”nın cəmiyyətin intellektual potensialının artırılmasında baza kimi oynadığı mühüm rola nəzər salınıb.
Forumun sayca 5-ci olan bu panel iclasında yazıçı Əkbər Qoşalının moderatorluğu ilə “Dəyərlər və etik davranış kodeksləri: kitabın fərdi və sosial həyatda əhəmiyyəti və funksiyaları” mövzusunda işgüzar müzakirələr aparılıb. Paneldə Xalq yazıçısı Çingiz Abdullayev, Xalq şairi Ramiz Rövşən, Azərbaycan Milli Kitabxanasının direktoru Kərim Tahirov, Azərbaycan Nəşriyyatları Assosiasiyasının İdarə Heyətinin sədri Şəmil Sadiq, Bakı Kitab Mərkəzinin direktoru Günel Anarqızı, “Təhsil” nəşriyyatının direktoru Tural Axundov, "Qanun" nəşriyyatının direktoru Şahbaz Xuduoğlu, “AudioKitab”ın direktoru Əhliman Ərşadlı iştirak ediblər.
Natiqlər "Azərbaycanda kitab sənayesi: mövcud vəziyyət və hədəflər", "Ölkəmizin kitab bazarına daxil olan xarici ədəbiyyatın milli dəyərlər və düşüncə sisteminə təsiri", "Kitab satışı sistemi: innovativ həllər və kredit mexanizmləri", "Kitab sənayesinin inkişafına dövlət dəstəyinin mexanizmləri" və "Vətəndaşların ədəbi, elmi və informasiya tələbatının ödənilməsində Azərbaycan Milli Kitabxanasının üzərinə düşən vəzifələr" kimi mövzuları sərf-nəzər edib, dəyərli təkliflər veriblər.
Panel iclası başa çatandan sonra iştirakçılar “Xalq qəzeti”nə verdikləri müsahibələrdə forumun təşkilini yüksək qiymətləndirib, layihənin hər il keçirilməsinin vacibliyini vurğulayıblar.
Elçin HÜSEYNBƏYLİ, yazıçı-dramaturq, AYB-nin katibi, Əməkdar incəsənət xadimi:
– Fikrimcə, forum çox uğurlu keçdi. Heydər Əliyev Fondu ilə Mədəniyyət Nazirliyinin təşkilatçılığı ən yüksək səviyyədə idi. Elm və Təhsil Nazirliyinin, Azərbaycan Milli Elmlər Akademiyasının sanballı dəstəyi bütün forum boyunca hiss olunurdu.
Bu gün ölkəmizdə milli-mənəvi sərvətlərin etibarlı şəkildə qorunması və onun gələcək nəsillərə çatdırılması istiqamətində silsilə tədbirlərin gerçəkləşdirilməsi fərəh doğurur. Sevinirik ki, ana dilimizin qorunması, ədəbiyyatımızın dünyada təbliği, kitab nəşrində qabaqcıl texnologiyaların tətbiqi ilə bu işin dövrün tələbləri səviyyəsində qurulması başlıca mərama çevrilib.
Düşünürəm ki, forumda aparılan fikir mübadilələrinin sayəsində perspektiv vəzifələrə konkret aydınlıq gətirildi. Forumda söylənilən fikirlər, təkliflər diqqətə alınacaq və gələcəkdə ana dili və ədəbiyyatımızın daha da inkişafına kömək edəcək.
Aybəniz ƏLİYAR, AYB üzvü, şair:
– Ədəbiyyat hər bir xalqın milli sərvətidir. Bu sərvətə qayğı baxımından forumun təşkili təqdirəlayiqdir. Panel iclasları yüksək səviyyədə keçdi, konkret əməli təkliflər səsləndirildi. Əsas qayənin ana dili və ədəbiyyatımızın daha da inkişafı olduğu aydın görünürdü. Xalq şairləri Sabir Rüstəmxanlının və Vahid Əzizin, akademik Rafael Hüseynovun, Milli Məclisin komitə sədri Qənirə Paşayevanın, yazıçı Şərif Ağayarın çıxışları öz konseptuallığı ilə daha böyük maraq oyatdı.
Milli ədəbiyyatımızın bütün bölgələri əhatə etməsi, ucqarlarda yaşayan ədəbi qüvvələrin birləşməsi, istedadların üzə çıxarılması səylərini alqışlayıram. Baxın, 3 il əvvəl bizim Şabranda AYB-nin regional bölməsi elə həmin amalla yaradıldı və istedadlı yazıçı Aydın Tağıyev bölməyə sədr seçildi. Biz orada vaxtaşırı əbədi-bədii tədbirlər keçirir, Şabran, Siyəzən və Xızıda yaşayıb-yaradan yazarların əsərlərini müzakirə edir, çapına və təbliğinə yardımçı olmağa çalışırıq.
Söz-sənət bayramı sona yetsə də, orada səsləndirilən fikirlər, təkliflər aktuallığını saxlamaqdadır. Mədəniyyətimizin inkişafı və təbliğində Azərbaycan dili və ədəbiyyatının rolu əvəzsiz olduğu kimi, bu sahələrin daim diqqətdə qalması da mühüm zərurətdir.
Əli NƏCƏFXANLI, XQ