Tarif (qiymət) Şurasının iyulun 31-də keçirilən növbəti iclasında daşınmaz əmlakın qeydiyyatı, texniki inventarlaşdırılması və kadastrı xidmətləri üzrə tariflər, həmçinin dərman vasitələrinin qiymətləri təsdiq edilib.

Tarif Şurasının katibliyindən aldığımız məlumata əsasən, yeni tariflərlə bir sıra güzəştlər nəzərdə tutulub. Bu güzəşt­lər çərçivəsində şəhid ailəsi üzvlərinin, hərbi əməliyyatlar nəticəsində əlil olmuş hərbi qulluqçu və mülki şəxslərin daşın­maz əmlaklarına, işğaldan azad olunan ərazilərdə yerləşən daşınmaz əmlak ob­yektlərinə münasibətdə xidmət haqqına 50 faiz güzəşt tətbiq olunub. Bununla ya­naşı, kənd təsərrüfatı, sənaye, nəqliyyat, rabitə, müdafiə və digər təyinatlı torpaq­lar üzrə, eləcə də çoxmənzilli yaşayış bi­nalarının inventarlaşdırılması üzrə tariflər azaldılıb. Sahəsi min kvadratmetrə qədər olan əmlakların tariflərində də azalma tətbiq olunub. Yeni tariflərə uyğun olaraq, qeyri-yaşayış sahələri üzrə xidmətlərdə xərclər azaldılıb. 

Şuranın qərarına əsasən, tariflərin sayı 79-dan 60-a endirilib, qanunverici­liyə dəyişikliklər nəticəsində yaranmış yeni 9 xidmət üzrə tariflər müəyyənləş­dirilib, 21 tarif mövcud səviyyədə saxla­nılıb, xidmət göstərilmədiyi üçün 29 tarif ləğv edilib, 5 tarif alt qruplara keçirilərək ümumiləşdirilib. 

Xidmət sayının optimallaşdırılması bir sıra istiqamətlər üzrə xidmət haqqının aşağı salınmasına və ya tamamilə ləğv edilməsinə imkan yaradıb. Həmçinin ya­şayış sahələrinin qeyri-yaşayış sahələri hesabına çarpaz maliyyələşdirilməsinin aradan qaldırılması məqsədilə müvafiq tariflərə dəyişikliklər edilib.

Tarif Şurasının iclasda, həmçinin yeni dövlət qeydiyyatına alınan 95 dərman vasitəsinin qiyməti təsdiqlənib və etibar­lı təchizatın təmin olunması məqsədilə Səhiyyə Nazirliyindən müvafiq rəy alı­nan 47 dərman vasitəsinin qiymətində isə Nazirlər Kabinetinin 2015-ci il 3 iyun tarixli qərarı ilə təsdiqlənən Qaydalara və Tarif Şurasının 2015-ci il 21 iyul tarix­li Qərarı ilə təsdiqlənən Təlimata uyğun dəyişikliklər aparılıb. Ticarət adı, farma­sevtik forması, təsiredici maddəsinin adı, dozası, ticarət qablaşdırması, miqdarı, istehsal ölkəsi nəzərə alınmaqla, qiymə­ti təsdiqlənən dərman vasitələrinin tam siyahısı Tarif Şurasının rəsmi internet saytının (www.tariff.gov.az) “Dərman va­sitələri” bölməsində (http://tariff.gov.az/documents/DVA.pdf) yerləşdirilib.

“Xalq qəzeti”