32 mindən çox şəxsə bərpa-sağlamlıq xidməti göstərilib
Dövlət Tibbi-Sosial Ekspertiza və Reabilitasiya Agentliyi tərəfindən 2023-cü ilin 6 ayında 25,5 min şəxsə əlillik təyin edilib. Bu barədə Əmək və Əhalinin Sosial Müdafiəsi Nazirliyindən aldığımız məlumatda deyilir.
Həmçinin bildirilir ki, onlardan 12 min 200 nəfərinə ilkin, 13 min 300 nəfərinə isə təkrar əlillik təyinatı aparılıb. Qeyd edilir ki, əlilliyin qiymətləndirilməsi elektron sistem üzərindən, səhiyyə müəssisəsinin e-sistemə daxil etdiyi göndərişlərdəki məlumatlar əsasında həyata keçirilir. Əlillik təyinatından sonra e-sistem üzərindən əlilliyə görə proaktiv qaydada sosial ödənişlər təyin olunur.
Son 6 ayda agentliyin reabilitasiya müəssisələrində əlilliyi olan 32 min 100 şəxsə reabilitasiya xidməti göstərilib və 6 min 100 əlil 38 min 600 reabilitasiya vasitəsi ilə təmin edilib.
Pensiyalara ödənilən vəsait artıb
Nazirlikdən bildiriblər ki, 2023-cü ilin 6 ayında pensiya ödənişlərinə ötən ilin müvafiq dövrünə nisbətən 16 faiz (402 milyon manat) çox olmaqla 2 milyard 843 milyon manat vəsait yönəldilib.
Bu ilin əvvəlindən reallaşdırılan növbəti sosial islahat paketi çərçivəsində minimum pensiya da fevralın 1-dən 240 manatdan 280 manata çatdırılıb. Keçən il pensiyaçılara verilən maddi yardımlar 2023-cü ilin əvvəlindən onların pensiyaları tərkibinə daxil edilərək pensiyaları artırılıb. Həmin artım tətbiq edildikdən sonra pensiyaların 2022-ci il üzrə orta aylıq əməkhaqqının illik artım tempinə uyğun olaraq 14,7 faiz indeksləşdirilərək artırılması təmin edilib.
Pensiyaların orta aylıq məbləği son 6 ayda 18 faiz artaraq 433 manata, o cümlədən yaşa görə pensiyaların orta aylıq məbləği 17 faiz artaraq 466 manata çatıb. Bu ilin yanvar-iyun ayları ərzində 18 min, elektron pensiya təyinatına başlandığı 2019-cu ilin əvvəlindən isə 89 min 500 pensiya təyinatı e-sistem üzərindən proaktiv qaydada həyata keçirilib.
Z.HÜSEYNOVA,
“Xalq qəzeti”
