Tərtərdə AMEA Folklor İnstitutu bu rayonun İcra Hakimiyyəti ilə birgə görkəmli ictimai xadim, ədəbiyyatşünas, yazıçı-publisist Firidun bəy Köçərlinin anadan olmasının 160 illik yubileyinə həsr olunmuş “Firidun bəy Köçərli və Qarabağ ədəbi-mədəni mühiti” mövzusunda respublika elmi konfransı keçirib.
Konfrans iştirakçılarını salamlayan Tərtər Rayon İcra Hakimiyyətinin başçısı Müstəqim Məmmədov bildirib ki, “Heydər Əliyev İli” çərçivəsində təşkil olunan konfrans Ulu öndərin milli-mədəni dəyərlərimizə və xalqımızın görkəmli simalarına sevgi və ehtiramla bağlı formalaşdırdığı ənənələrə söykənir. Görkəmli maarifçi-demokrat Firidun bəy Köçərli xalqımıza tarixi xidmətləri ilə azərbaycançılığın ideya-məfkurəvi əsaslarını gücləndirmiş soydaşlarımızdan bir olduğuna görə bu gün biz onun mənalı ömür yoluna, zəngin mənəvi irsinə Ümummilli liderin dövlətçilik ideologiyasına çevirdiyi məfkurə işığında nəzər salırıq.
AMEA Folklor İnstitutunun baş direktoru, akademik Muxtar Kazımoğlu konfransın Qarabağda keçirilməsinin əhəmiyyətindən danışaraq söyləyib ki, tədbirin Tərtərdə keçirilməsi heç də təsadüfi deyil. Firidun bəyin soy-kök etibarilə bağlı olduğu köcərlilər tayfasının bir qolu da Qarabağ xanlığı dövründən bu rayonda məskunlaşıb. Tərtərlilər Köçərli kəndinin və Şişanın Köçərli məhəlləsinin mənşə ortaqlığının timsalında, haqlı olaraq, bu bağlılıqla fəxr edirlər.
Akademik daha sonra qeyd etdi ki, Firidun bəy Köçərli Azərbaycan humanitar fikrinin inkişafında, onun ideya və istiqamətlərinin müəyyənləşməsində danılmaz rolu olan böyük tənqidçi, ədəbiyyatşünas alim və pedaqoqdur. Peşəkar maarifçilərimizin bütöv bir nəslinin müəllimi olmuş bu görkəmli ziyalı həm də ilk Azərbaycan ədəbiyyatı tarixinin yazılmasında, uşaq ədəbiyyatının təməlinin qoyulmasında, ədəbi-tənqidi fikrin formalaşmasında önəmli təməllər yaratmışdır.
Folklor İnstitutunun əməkdaşları professor Ramazan Qafarlı, professor Seyfəddin Rzasoy, filologiya elmləri doktorları Mətanət Abbasova, Leyla Məmmədova, dosentlər Qalib Sayılov, İlhamə Qəsəbova, Elçin Abbasov elmi məruzələrlə çıxış edibər.
Xatırladaq ki, qəhrəmanlıq şəhəri Tərtərdə AMEA Folklor İnstitutu və Tərtər Rayon İcra Hakimiyyətinin birgə təşkilatçılığı ilə ikinci dəfədir ki, respublika elmi konfransı keçirilib.
“Xalq qəzeti”